من وقت بنكون صغار عنا أحلام كتيرة .. بعض من أحلامنا بتكون هي تحقيق لأحلام أهالينا متل إنك تصير دكتور متل خالك أو طيار متل ابن عمك أو صحفي متل ابن الجيران .. أو مثلاً انه نتزوج ونعمل عيلة و أولاد عشان أهلنا والمجتمع يكونو مرتاحين وراضيين .. وباللاشعور بصير هدف وحلم لازم نحققو ..
والبعض الآخر من أحلامنا بتكون إلنا وبس .. عادةً بيكون الشغف هو اللي بيقودنا لنحققها ..
بيمضى عمرنا ،، الواحد منا بلا ما يحس وبعد ما يحقق أحلام و أهداف المجتمع بيكون (غير راضِ ) !! وبتلاقيه دخل بدوامة انه ليش مو سعيد مع إنه هدف من أهدافي تحقق ؟!
وبيكون الجواب اللي بيكتشفه بعدين إنه (لأنه من الأساس كان هالشي مو هدفك وانت استهلكت سنين من حياتك عشان تحققه)..
واذا كنت شخص ذكي بتكون لحقت حالك بنص هالدوامة وحققت هدف من اهدافك وحلم من احلامك الشخصية (اللي ممكن انها تكون انك تشتري لعبة، بيت ، ارض ، كوكب ... إلخ )
..
حققو أحلامكن وأهدافكن قبل ما تحققو هدف أي شخص تاني .. استهلكو أيامكن و ووقتكن بالسعي ورا شغفكن شو ما كان .. ولو زاد معكن شوية طاقة و وقت حققو أهداف المجتمع من باب زيادة الخير ولا تحسو بالذنب لو ما مشي الحال لأنه من الأول مو هدفكن !
نشوة النجاح مارح تحسو فيها غير لما تحققو اللي إنتو بدكن ياه .. وتستمتعو ب كل إنجاز عملتوه في سبيل الوصول ل هدفكم ..
حب الذات مو أنانية .. والسعي ورا تحقيق أحلام الذات مو عيب ..
دمتم بخير
هبة
