باڤێ من ئێدی کال بووبوو. وەختێ دخوەست ڕابە سەر پیان، پڕی جاران دەستێ خوە ب دیوارێ خێنی دگرت. ئەوقەس دەستێ خوە دابوو دیوێر، کێم کێم شوونا بێچیێن وی ل سەر دھاتە بەر چاڤ؛ دیمەنا کو نیشانەیا لاوازی و بێقاوەتیا وی بوو.
ھەڤژینا من کو ژ ڤێ دیمەنا سەر دیوارێن مالێ ناراھەت دبوو، تمێشە قارێ خوە دھانی و جارجاران گلھە دکر کو باڤۆ دیوارێن مالێ گشت پیس و قەفچل کرنە.
ڕۆژەکێ باڤێ من سەرێشانەکە گران گرتبوو؛ دەرمان ھلانیبوو و ب بێچیان مالیبوو سەرێ خوە تا کو پێ سەرێشا خوە ئارام بکە. وێ ڕۆژێ ژی دەما خوەست ڕابە سەر پیان، دیسان مینا ئادەتەکێ دەستێ خوە دا دیوێر و ئەڤ کارێ وی بوو سەبەب گەلەک لەکەیێن ڕوون بکەڤن سەر دیوێر و دیمەنەکە تژی پەنجەمۆر ل سەر بێ نەقشاندن.
ھەڤژینا من دەما ئەڤ یەکا دیت پڕ ناراھەت بوو و ب ھێرس و دەنگەکی بلند کرە چڕی و ب باڤێ من را گۆت: "تو ب خوەدێ کی دەستێ خوە مەدە دیفێل!" دوو را ژی د بەر خوە را گۆت: "دیفال میفالێن ڤێ مالێ وە خێرا من دانە! ژە دەست ڤانا چەرە کەم ئەی خوەدێ!"
باڤێ منێ بێچارە خەف کر، بێدەنگ بوو؛ گەپ ل گەوریێ ما. خەم و کەسەرەکە گران ل چاڤێن وی دھات خانێ... کۆتی ھاتە دل.
شەڤا پێش ئەز و ھەڤژینا خوە ڕووقالی ھەڤدو بووبوون و دەڤەژەنیەکە توند ناڤبەرا مە چێ بووبوو، لۆما من تشتەک نەگۆت. یانی ژ وێ ڕەفتارا ھەڤژینا خوە شەرمەسار بووم، لێ من ژی خەف کر و تشتەک نەگۆت.
ژ وێ ڕۆژێ و پێ ڤا باڤێ من ئێدی دەستێ خوە ب دیوێر نەگرت. تا ڕۆژەکێ کو ژ تەقافل دا ھەڤسەنگیا خوە ژ دەست دا، ھەشی چوو و کەتە ھەردێ. ھەستیێ ھێتێ شکەست. مە ئەو ڕاکر نەخوەشخانەیێ و نەشتەرگەری ل سەر ھات کرن، لێ ب تەمامی ڕند نەبوو و پشتی چەند ڕۆژان ئەم کەلۆگری بجی ھیشتن و چوو...
گەلەکی دلتژی و پشێمان بووم. ھین ژی ژ بیرا من نارە چەرە باڤێ من خەف و بێدەنگ تەماشە دکر. نە ئەو ڕۆژا من بەرددە و نە دکارم خوە بباخشینم.
پشتی دەمەکێ مە بریار دا کو خێنی ڕەنگ بکن. وەختێ نەقاش ھات، لاوێ من کو پڕ خاترێ باڤکالێ خوە دخوەست، نەھیشت ئەو دیوارێن کو شوونا بێچیێن باڤکالی ل سەر بوون، بێن ڕەنگکرن.
نەقاش کو مرۆڤەکی تێگھیشتی و ژیر بوو، ب جوانی خەتەک ل دۆرا وان پەنجەمۆران کشاند و کارێ خوە پێ نەکر. تە دگۆت دیوار بووبوون بەرھەمەکە ھونەری یا جوان.
کێم کێم ئەو شوونا بێچیان بوو نیشانەیا مالا مە. ھەر کەس دھاتە مالێ، بێ گومان ماتە وی دیواری دما؛ لێ کەس نەدزانی چیرۆکا ل پاش ڤێ دیمەنێ چیە. کەس نەدزانی چ ڕاستیەکە تال و سەرپێھاتیەکە چاوا تێدا ڤەشارتی یە و کەس پێ نزانە.
دەم و دەوران دەرباس بوو و ئەز بخوە ژی نکا کال بوومە. ڕۆژەکێ من خوەست ڕابم سەر پیان و ب ڕێ ھەرم، ئەوقەسی من تالاش کر، ژوونیێ من گوڤە من نەکر؛ ڤێجا من دەستێ خوە دا دیوێر. وی چاخی ئەو سات و کێلیا بەرێ و باڤێ من ھات بیرا من - ڕەفتارا ھەڤژینا من ب باڤێ من ڕا، بێدەنگیا وی و ئێش و ئازارا کو وی کشاند. من خوەست بێ کو ژ دیوێر کۆمەک بگرم، قەدەم هلینم؛ لێ نەبوو…
لاوێ من کو ھەر تشت ددیت، بلەز ھاتە پێش و گۆت:
"باڤۆ، خێرا خوەدێ دەستێ خوە بدە دیوێر، دەنا دکەڤی!"
ب دوو ڕا، نەڤیێ من خوە گھاندە من و گۆت:
"باپیر، دەستێ خوە بدە سەر پیلێ من!"
گاڤا من ئەڤ گەپانا بھیستن، چاڤێ من تژی ھێستر بوون. خوەزی و سەد خوەزی... خوەزی دلێ من ژی ھاکا ب باڤێ من بشەوتیا، خوەزی ئەز ژێ را ببووما چاکل، خوەزی من ئەو ل پشتا خوە بکرا و بگەڕاندا - گاوەشە چەند ڕۆژان پرتر ل جەم مە بمایا.
لاو و نەڤیێ من ب ئارامی ئەز گھاندمە ئۆدەیێ. پاشێ نەڤیێ من پرتووکا خوە یا نەقاشیێ ھانی، نیشانی من دا کو مامۆستەیێ وی پڕ ژ نەقاشیەکە وی تاریف کریە - ئەو نەقاشی قە ژ سەر ھەمان دیواری ھاتبوو کشاندن کو شوونا بێچیێن باڤێ من ل سەر مابوو.
ل بن وێ نەقاشیێ، مامۆستا نڤیسیبوو:
چقەسی ڕندە ھەر زارۆکەک ھاکا خاترێ مەزن و مەسترێن خوە بخوازە و دلسۆژێ وان بە!
چوومە کونجەکی مالێ کو کەس من نەبینە، ب بیرا باڤێ خوە یێ خوەدێ-ژێ-ڕازی ھیسکەھیسک دگریام و من ژ خوەدێ دخوەست ل من ببۆرە.
بەرات قەویئەندام
(وەرگەراندی)
