ئه‌ی نه‌سیمێ سه‌حه‌رێ ما د مه‌جالا سبه‌هێ
سه‌د سه‌لامان بگه‌هینی ژ مه وێ پادشه‌هێ
عه‌رعه‌را قامه‌ت ئه‌لف نه‌یشه‌که‌را شۆخ و شه‌پال
نازکا سیمته‌ن و خوسرەوا زه‌ڕینکوله‌هێ
د به‌رێ دا تو ببووسی ب دوسه‌د زاری و لوتف
ئاستان و ده‌ر و دیوار و شباکێن قه‌له‌هێ
نامه‌یا جه‌ور و جه‌فا و ئه‌له‌م و ده‌رد و خه‌مان
دێ ب ده‌ستێ زه‌ریێ موهته‌شه‌مێ سه‌روسه‌هێ
به‌لکۆ دلبه‌ر ژ ڕوویێ عادلی و مه‌رهه‌مه‌تێ
ڕه‌همه‌کێ کت ب فه‌قیران و بپرست گله‌هێ
هه‌ق دزانت د شه‌ڤان شوبهه‌تێ ئاڤێن د ڕۆیان
مه ب دل زاری و کالینه هه‌تا سوبهگه‌هێ
ما ژ به‌ر ده‌رب و فراقا ته سوکوونه‌ک مه هه‌یه
جه‌رگ و دل هه‌ر دو ب نالینه وه‌کی چه‌نگ و ژەهێ
په‌رده‌یا خێلی و چارێ تو ژ سه‌ر دێمێ هلین
دا ژ شه‌وقا ته ب خه‌ف بت شه‌فه‌قا مهر و مه‌هێ
دین ئه‌گه‌ر بێته به‌ها جان ددرم لێ ئه‌مما
مه هه‌زار جانێ عه‌زیزی دهلیتن د به‌هێ
قه‌ت دبت وه‌ک ته شه‌پالێ نه د شام و نه د شه‌رق
کێ نشان دا د جه‌هان مسلێ ته خوندکار و شه‌هێ
عاله‌مه‌ک شه‌هده‌ییا هوسن و جه‌مالا ته ددت
تو زوله‌یخایێ زه‌مانی وه چ هاجه‌ت مه‌ده‌هێ
هه‌ق نگه‌هدارێ ته بت پادشه‌ها سه‌روقه‌دان
ب کنارێ مه فه‌قیران بکه جاره‌ک نگه‌هێ
خۆبی و دلبه‌ری و ناز و ته‌له‌تتوف ب ته شێن
خوسروویا پادشه‌هانی وه خودانا جه‌به‌هێ
هه‌جه‌ر-ئه‌سوه‌د بدرت ده‌ستێ زیاره‌ت بکرم
نه‌زرێ من بت بگرم خواس- ته‌ریقا مه‌که‌هێ
ژ ئه‌زه‌ل هه‌ق ب مه‌لێ دایه ژ عشقێ قه‌ده‌هه‌ک
تا ئه‌به‌د مه‌ست و خه‌رابین ژ مه‌یا وێ قه‌ده‌هێ
مه‌لایێ جزیری (۱٥۷۰-۱٦٤۰)
