عنوان یا خود باشلیق چوْخ گؤیۆل آچان، گۆنه اویغون بیر سؤزلر اوْلماغا باخمایاراق تنقیدی بیر یازی دی.«شرکتیمیز واریدی. اؤلکه نین یاسالاریلا بوْیروقلاری اۆزره قورولموشدو. سوییه لی(رۆتبه)، یئرلی-یاتاقلی دفتری، گل-گئدی واریدی. هئیت مۆدۆره سی تام گنج، تزه جه بیلی یورددان درسلرین بیتیرن ایدیلر. شیرکت کاغیذ اۆزره اوْلان چاغی هامی مهریبان، بیر-بیرین دۆشۆنۆب، قانان ایدیلار. شیرکت ایش آلیب. ایشله ییب. پول آرایا گلندن سوْنرا سؤز بازلیقلار، آرخادا دانیشمالار آرتدی. ائله اوْلدو کی، هفته ده نئچه دفه اوتوروم(جلسه) قورولوردو.
بیر گۆن سؤیله دیم: اوْتوروملارین سوْنوجو اوْلمالیدی. بیر سونوج گؤره بیلمیرم آخی؟! بو آندان سوْنرا آرالیق چوْخالدی. ائله اوْلدو. ان آز پایی اوْلان اوْرتاغیمیز، سؤیله دی: سیزین(منیم) اوْلوب، اوْلماماغیزین شیرکته هئچ ائتگی سی یوْخدور. منه چوْخ آغیر گلدی. توتولدوم. داها دوْغروسو اۆزۆلدۆم. چۆن شیرکتین تام سوییه سی (رۆتبه) یالنیز کئچمیش سابیقه مه گؤره وئریلمیشدی. چۆن هله یوْلداشلارین بیلی یورد ورقه لرینین مۆرککبی قورومامیشدی.
شیرکت بوراخیلدی. گئت-گئده دالی لادی. نئچه ایشدن، یالنیز بیر یاریمچیق ایش قالدی. آیریلیشدیق. شیرکت پۆشک له، پایلار اؤده نیلندن سوْنرا، من له قارداشیما قالدی. جانلا چالیشیب، شیرکتی داغیلماقدان قوْرودوق. ایش آلیب، شیرکتی یوْخاری قالدیریردیق. گۆن، اوْ گۆنه گلیب چاتدی کی، احمدی نژاد ایکینجی دفه باشقان اوْلدو.
مقاویله لرده اوْلان تعدیللر، یاری یا یئنیلدیلر. بورادان بری شیرکت له بیزیم، دۆنرگه میز دؤندۆ. اۆزۆ آشاغی دۆشدۆک. وار-یوْخدان چیخدیق.» بو بیر دوْغرو-دۆزگۆن یاشام اوْلایی اوْلاراق قوْنویا گلیرم. بیزیم شیرکت نییه یئنیلدی؟ بیر نئچه ندن سایماق اوْلار:
- بیز بیرگه ایشله مه یی باجارمیریق.
- تام گنج و اؤرنکسیز(تجروبه سیز)اوْلدوق.
- یالنیز ایکی کمیسه دن باشقا، قالانی نین ایکینجی ایشی اوْلماق.
- پولسوز-پاراسیز، داها دوْغروسو یاتیریمسیز ایش باشلاماق.
- اؤلکه ده گئدن سیاستدن قیراقدا قالماق. اوْنو باشا دۆشمه مک.
- رانتلارا، رۆشوتلره قوْشولماماق.
- میللتچی فیکیرلرین بیر یئرده، بیر شیرکتده ایش بیرلیگی.
- باجاریقلی وکیل له بیلگین حسابدارین اوْلماماغی.
- اۆزۆ یوموشاقلیق.
- بیر قیرانی قوْوماماق.
- داغینیق ایشله مک.
- کئچمیشلرین، اؤرنکلریندن یارارلانماماق.
دوْستلار چوْخلو ندنلرده، سایماق اوْلار. آما سوْن سؤزۆم.
میللتچیلیگی، یئنی دۆشۆنجه یله، یئنی یوْللارلا سینامالییق. سۆرمه لی ییک.
تام اؤزۆمۆزه قاییدیب، تنقیدله یۆرۆمه لی ییک.
چۆن توپلوم ایشلری قارشیلی اوْلار.
