شێت بۊن، بهشێگ له ژیانه. ئهگهر بهیدهو کۊهیش، کڵاس جیاوازێگ دێرێ. ساڵ1398 خوهرین و مانگ رهمشان یا ئسفهند بۊ ک تواسم دهس بکهمه کار جیاوازێگێا. کار وهو چۊنه گ دۊنین نه!. ههر ئهو چۊنه گ شێتهگان دهنهو کۊه، منیش نیشتم و ئهول خوهما بهڵگهێگ ئمزا کردم ک دی لهێرهو دۊا یهێ دهورهێ کۊهگهردین جیاواز داشتووم.
دهس کردمه پێ و وهن «فهڕخشاد» کرماشان نام. م لهێوامه: دهس کهم وه ههر کارێگ، له رووژهیل ئهوهڵهو فره تن و تێژم. وڵام ههر چێ وهرهو نواترهک بچم، خاوهو بووم. هه یه بۊ گ له ئهوهڵکڕ بڵهگهگه گ ئهول خوهما ئمزا کردم، نۊسام: هووشد بوو! یه دی خاوهو بۊن نهێرێ...
رووژهیل ئهوهڵ، له ناو ههفته 5 جار کهفتمهو ڕێ ئڕاێ سرشاخهگهێ «فهڕخشاد». ههفته و مانگ دامهو دهم یهک و ئێ کاره دریژه پێا کرد. ئهمانێگ دیم ئێ ههمگه رووژه گ چم، لهپساێ له لهشم بڕێ. پهنججارهگه له ههر ههفته، بۊ وه سێ جار و چهن ساڵه دریژه پێا کهێد.
شێت بۊن، بهشێگ له ژیانه. ئهگهر بهیدهو کۊهیش، کڵاس جیاوازێگ دێرێ. ههر لهو ساتهو ک خێ دامه کۊهگهردین، «تهنیایی» و «شهو» بۊنه ڕهفیقم و کتاوهیل دهنگی ک ههناێ ئهول تهنیایی و شهوا بوونه هاوڕێ ڕێارهیل، شێتی، شرینترین شێواز ژیان بوود.
تا ئێرنگه گ ئابان چوارسهد و چواره، لان کهم ههفتهێگ د جار چمه سهرشاخ «فهڕخشاد». وهفر بوو، واڕووه بوو، تیهریکهشهو بوود یا شهوهیل مانگاهشهو، چم و چهنساتێگ بوومه هاودهنگ وا له نزیکترین ڕێ ئڕاێ ڕهسین وه جههانێ گ له زهۊ دۊره.
ڕومان و مێژوو و فهلسهفه هاوڕێهیل زمسان و تاوسان منن و فره جار وه ههر جیێگا چهو گل دهم ، سانهگان، دارهگان، تاشهگان و ڕێهگان خهنهمهو هۊر فرهکهس و فره چشت.نیهزانم ئۊهیش ئێ چۊنه ئازمانه داشتینه یا نه؟
له ژیان ئهول سلین و سهفهر وه بنهڵبن شهوێ گرتێه تا خوان ڕولفو و هرتا مولر و ئانی ئرنوو و براتیگان و تولستوی و ونه کات، له رووبر مرل و موودیانو تا نیچه و پوپر و ژیژهک و بودریار و لاکان و سارتر و کگارد و ئابراهامیان و هان کانگ و یون فوسه و توکار چووک و سهدان کهس ترهک، ئازمان جیاوازێگه گ من و شهوهیل فهڕخشاد و تهنیایی ئازمانێان کردیمنه...
شێت بۊن، بهشێگ له ژیانه. ئهگهر بهیدهو کۊهیش، کڵاس جیاوازێگ دێرێ. ئێرنگه ڕێهگان، چۊ لهێرهوهر نیین. له بان ههر سانێگ یا له گژ ههر دارێگ ئڕاێ م لهش بهشێگ له کتاوێ مهنێهسه جی.
فره جار ئڕاێ کاراکترهگان، ئاێهمێگ له ناو کوومهڵگا دیمهسهو. ئاێهم خاسهگان فرهتر له تار دارهگانهو بۊن و ههن. ئهمانێگ وه داخهو ئێ ڕێه گ چم، فره دار نهێرێ!. له هر یاڵێگ تهنیا یهک دوان!. ئهمانێگ تا دڵد بقرچێد و بتواێد، وهشیاتان و قومقومهک و کوڵهنجی و مهل و موور و مار و کوچگ ههس و کوچگ!
بڕێگ له کوچگهیل، تهنیا کارێان یهسه گ نواێ ڕێ بگرن. میننه ئاێهمهیل پۊچهڵێ گ تهنیا مل گرتن زانن. وڵام گشت زانن گ هۊچ له زاتێان نییه!...
ئێرنگه، ههر جارێ گ چم، دی ڕێهگه ئهو ڕێ ڕووژهیل ئهوهڵه نیه. چمانێگ ههر له خوار تا بان، کتاو ڕشیاێه و کاراکترهگانێان له بان ڕیهگان هانه شوون بهشێگ له ژیان خوهێان...
