ئاماژهێگ ئڕاێ ئهوانهیل!
وهفر بوارێ یا نهوارێ، خوهر تاوسان بوو یا کهویهخ زمسان، بوو پوتین باێ یا تهرمهیل شان ئێوارهگان، له وهر داوان رووژهیل بهتاڵهو بۊ، ئاێهمهیل تاڵ تاڵهو بوون. ههر تاڵێگ وا بهێدهێ، چووده شوون سهراوهنۊنی. ههر تاڵێ گ مینێدهێ، بووده کوومهێ زۊخ. باێهس وه دهنگ مردارهگان خوو بگرێ.
گیسهیل، تاڵ تاڵهو بوون؛ جوور مناڵ مهدرهسهیل سات دوانزهێ ئاوای کوردهگان. له ماڵه نزمهگان، بهش بهشهو بوون تا هۊردهقیژهێان ئڕاێ بڕێگ بووده ماێهێ ژیان.
وهفر بوارێ یا نهوارێ، خوهر تاوسان بوو یا کهویهخ زمسان، ئیمهیش تاڵ تاڵهو بۊمن. ئهما ههر کهس له وێنهێ خوهێ تاڵ تاڵهو بوو. ههر ئهو جووره گ له وێنهێ خوهێ هاوش کوتێ له زنێانی. له سهر سهماتهیل مهرگ، له چوارڕێان فرۆید و کگارد و لاکان و کانهیل ژان، کهشکهشان وه کهشکهشان ئاواره بوود و له لاپهڕهێ هۊچ پرتووک ئایینیێگ لهپاڵێگ نان نیهۊنیدهو. ههر چێگ ئمڕوو پا گل دهێ و زهۊ گهز کهێ، له ناو پرتووکهگان دۊهکهێنێ دیهسهو.
وهفر بوارێ یا نهوارێ، خوهر تاوسان بوو یا کهویهخ زمسان، ئاێهمهیل تهنیا له وێنهێ خوهێان ئاگر گرن؛ له وینهێ خوهێان، خوهێان خهنهو خوار و له وینهێ خوهێان مرن. م مردنهیل فرهێگ دیمه. هه چۊ «گراکووس شکارچی» له سهر چواردهڕێان دنیاگان ئاڵشت، سهرگهردانی کاڵیمه...
وهڕاس ساڵان فرهێگ، منیش گراکووسێگ بۊمه گ جنازهم بهێن مهرگ و زنێانی، شهوار وه شهوارِ وهفرین گهرداننه. تنیش شاهات ئهول منا بۊده و خوهد نیهزانی!. تابووتهیلێگ وه دزی ئێ کتاوهو خهت وه خهت شێعرهگان گهردینه. تنیش لاپهڕه بچهکن و بزان هایده ناو کام تابووت...
جهلیل ئاههنگهرنژاد. پایز 1400 کرماشان
