سوسن نوادﮤرضی‌نین خاطره گئجه‌سی
پنجشنبه فروردين آیی‌نین 10-جو گونو ائل‌بیلیمی‌نین ایل‌لیک بایرام گؤروشو سوسن خانیم نواده رضی‌نین خاطره گئجه‌سی اولاراق کئچیریلدی، دئمک سوسن‌سیز ایلین باشلانقیجیندا سوسنلی بیر گئجه کئچیریلدی.
شهریمیزین فرهنگی-اجتماعی فعال‌لارینین حضورو ایله کئچیریلن بو مراسمده آقای مهندس صرافی و خانیم آبدار مجلسین هيئت مديره‌سی و جناب کریم قربانزاده آپاریجی ایدیلر. ساعت 17:45 ده موسسه‌نین مدیرعاملی جناب «صرافی» اوتورومو رسما آچدیلار.
بیرینجی دانیشان ائل بیلیمی موسسه‌سینین قوروجولار هئیتی‌نین عضوو خانیم «زهرا آبدار» ایدیلر، اونلار سوسن خانیملا تانیشلیغی و سوردوگو یولداشلیق ایل‌لریندن دانیشدیلار.
ایکینجی «لادن نواده رضی» سوسن خانیمین عایله‌سی طرفیندن تریبون آرخاسینا چاغریلدیلار، مجلسین قوروجولاریندان تشکر ائدیب، سوسن خانیم حقینده دانیشدیلار و اونون عایله ایچینده اولان کاریزماسی، دگرلری و ائتگی‌سیندن سؤز آچدیلار.
اوچونجو دانیشان اولاراق سؤز سوسن‌ین یاخین دوستو و امکداشی «گونش امانی»یه وئریلدی. گونش خانیم اونون اخلاقی خصوصیت‌لریندن اطرافلی دانیشدیلار.
دؤردونجو دانیشانیمیز مشکین‌شهردن آیاغی‌نین توزویلا مجلسیمیزه گلن «تانسو خیاوی» سوسن نوادﮤرضی‌نین امکداشی اولدولار، کی مهدن تمدن گونده‌لیگی‌نین تورکجه سانجاق آدلی صفحه‌سی‌یله ایلگیلی چالیشمالاریندان دانیشدیلار و قوناقلاری بیلگیلندیردیلر.
سونرا «مرجان منافزاده» تریبونا دعوت اولوب، باش ساغلیغی وئریب، سوسن خانیمین دونیاسین دییشدیگی مناسبته یازدیغی شعری اوخودولار.
سیرادا تریبونا دعوت اولونان شهریمیزین بؤیوک مجموعه‌داری «رضا سرابی‌اقدم» سوسن نواده‌ی رضی‌نین مشاغل موزه‌سی‌نین قورولوشوندا چکدیگی زحمتلردن و ائتدیگی یاردیملاردان، هابئله چتینلیگه دوشدوگو زامان آرخا چیخیب، یاردیم توپلامالاریندان دانیشیب، خاطره‌سین حرمتله یاد ائتدیلر.
دالیسینجا گؤزل دیکلمه‌لری‌یله تانینان مخمل سسلی «کبری میرحسینی» سوسن‌ین "قیریق سطیرلر" عنوانلی شعرینی دیکلمه ائتدیلر.
سونرا «فرانک فرید» "اننه‌م‌نن من" کتابینا نظر سالاراق "اونون قادین جسارتی" مضمونوندا گؤزل و دگرلی صحبتلر ائتدیلر.
نوبتی دانیشان «اولکر تبریزلی» ایدی. او تریبون آرخاسینا کئچیب، سوسن‌ین "ابدیت" عنوانلی گؤزل شعرینی اوخودوقدان سونرا، اؤز دویغولارینی دیله گتیردی.
بو اثنادا اذان وقتی چاتدی و قیسا بیر آرا وئریلیب، ائل‌بیلیمی مؤسسه‌سی‌نین حاضرلادیغی افطارلیق قوناقلارا سونولدو.
افطاردان سونرا مراسمین ایکینجی بؤلومو سیدمحمد چاوشیان جنابلاری‌نین صحبتلری ایله باشلادی، او سوسن خانیمین اوچ اؤنملی خصوصیتی اولان (کاریزما و مدیریت و عمومی روابط)یندن دانیشدی.
کرج شهریندن قوناغیمیز اولان یازیچی «اکبر حمیدی علیار» باش ساغلیقی وئردیکدن سونرا، سوسن ایله بیرگه چالیشمالاریندان و سانجاق صحیفه‌سین یولا سالمالاریندان، شعرلشمه‌لریندن دانیشیب، نمونه اولاراق اونون بیر شعرینی اوخودولار.
ان سوندا جناب «فؤاد حسن حسین» سوسن خانیمین دگرلی اوغلو مجلسین قوروجولاریندان و اشتراکچی‌لاریندان تشکر ائدیب، سوسن خانیمین آرشیوی و کتابلارینی مهندس صرافی‌نین قوردوغو کتابخانا و آراشدیرما مرکزینه اهدا ائتدیک‌لریندن و یاخین گله‌جکده اونلاری سهمانا سالیب، نشر ائتمه‌لریندن سؤز آچاراق بو ایشده داوطلب‌لری یاردیما چاغیردیلار.
قید ائتمک لازمدیر کی اؤنجه‌دن حاضرلیقلارین بیلدیرن و دانیشانلار آراسیندا هئیت مدیره‌‌نین لیسته آلینانلاری تریبون آرخاسینا چاغریلدیلار، بیر چوخلاری دا سوسن خانیم حقینده دانیشیب، شعر اوخوماق ایستردیلر؛ آنجاق اؤنجه‌دن بونو بیلمه‌دیگیمیز اوچون هم‌ده وقت محدودیتینه گؤره بو عزیزلری چاغیرماقدان معذور اولدوق. وقتین محدودیّتینه گؤره بونلارین سایی ان اوزاق باشی 12 نفر نظرده توتولموشدو.
دانیشیقلارین سونوندا ائل‌بیلیمی طرفیندن بو مجلسده اورک سؤزلرین یازی یا شعر واسطه‌سی‌یله اوخویانلاردان هابئله کلیپی ایشله‌ینلر و موسیقی اکیپیندن تقدیرنامه ایله تجلیل اولوندو.
اؤزل اولارق دکتر میکائیل نظری‌‌نین سون وقتلر سوسن خانیم حقده چکدیگی زحمتلردن خصوصی‌‌یله اونون دفن مراسمینده دگرلی مدیریتیندن تشکر اولوندو.
دکتر ارگین افشار و ذکیه خانم ذوالفقاری، اؤز وقتلرینی قالان دوسلارا باغیشلادیقلاری اوچون آلقیشلاندیلار.
علیرضا فرشی و سولماز حسن‌پور "آذربایجانی سئون قادین‌لار" آدینا سوسن‌ین احسانیندا اؤز وصیتی اوزره زنجانین مهرانه خیریه‌سینه سوندوقلارینا بلگه‌سل تابلونو سوندولار و اولو روحونا رحمت دیله‌دیلر و وطن سئوگی‌سیندن، ائل سئوگی‌سیندن دانیشیب، دئدیلر سوسن خانیمی سئوگی هیکلی کیمی گؤروبموشلر.
بو قسمتده سوسن اوچون حاضرلانمیش 9 دقیقه‌لیک بیر کلیپ تماشایا قویولدو.
سون اولاراق موسیقی اکیپی صحنه‌یه گلدیلر و آراز قاسمی سازدا آتاسی محمدرضا قاسمی ایله اشتراکچی‌لاری ماهوردا چالینان بیر ماهنی‌یا قوناق ائله‌دیلر.
سونرا تاردا آراز قاسمی، کامانچادا رضا محمدی و ناغارادا فرزاد سلیمانی خواننده‌میز: آقای محمدرضا قاسمی‌نی مشایعت ائدیردیلر. ائل بیلیمی‌نین اوشاقلیقدان بری برنامه‌لرینده اشتراک ائدن، آلتای خدایی ده بایات شیراز دستگاهیندا همین اکیپین مشایعتی ایله اوخودولار.
موسیقی قوروپونا تشکر اولاراق سوسن خانیمین کتاب‌لاریندان هدیه اولوندو.
مراسمین زمانلاماسینا گلدیکده دئمه‌لییم کی برنامه اوچ ساعت نظرده توتولموشدو، تکجه یاریم ساعت اوزونا چکدی کی اونون دا 15 دقیقه‌سی اونون گئج باشلانماسینا عاید ایدی و بیر ربعو دا موسیقی بؤلومونه اضافه اختصاص وئریلدیگینه. بئله‌لیکله مراسم جناب قربانزاده‌نین آپاریجیلیغی و دگرلی مدیریتی ایله اوچ ساعت یاریمدان سونرا ساعت 21-ده سونا چاتیب رسما باغلاندی.
مراسمه آیریلمیش زمانین تقریبا اوچده ایکیسی دانیشیقلارا و اوچدن بیری ده موسیقی، فیلم، تقدیرنامه‌لرین تقدیمینه اختصاص وئریلدی.
قید ائتمک لازمدیر کی بو مجلسه ایکی یوز نفره یاخین شخصیتلریمیزدن قاتیلدیلار، بایرام گؤروشو اولدوغو اوچون بعضی‌لری تکجه محدود بیر فاصله‌ده اوتوروب، یئرلرینی باشقا قوناقلارا وئردیلر. آشاغیدا گؤروب تانیش اولدوغوم بعضی‌لرینین آدینی قید ائدیرم:
سوسن خانیمین عایله‌سیندن: لادن خانیم نواده رضی، جنابلار فریدون و فرخ نخجوانی، فوآد و عطا حسن حسین و ....
باشقا شهرلردن قاتیلان: مسعود فیوضات، تانسو خیاوی، اکبر حمیدی علیار و ذکیه ذوالفقاری و لیلا خانیم، علیرضا فرشی و... آد آپارماق اولار.
