بسم الله الرّحمن الرّحیم
بیوک تانری آدی ائله
فلک دریای کرامت یا حسین بن علی
طایراوج شجاعت یا حسین بن علی
در ره آزادی و آزاد گی با افتخار
یا فتی عزّ شهادت یا حسین بن علی
با لب عطشان کنار نهر دادی جان خویش
با فتوّت با شهامت یا حسین بن علی
هیجده ساله جوانت پیش رویت داد جان
در ره دین و دیانت یا حسین بن علی
یا قتیل العبره می نالند از بهرت همه
دوستانت تا قیامت یا حسین بن علی
در ره آزادی ما جان خود کردی فدا
جان ما بادا فدایت یا حسین بن علی / گلزار حسینی ص/5
دونن و بوگون کربلا قافله سالا رینین ، حضرت ابا عبدالله الحسین علیه السلامون و اونون وفادار قارداشی حضرت اباالفضل العباس علمدار کربلانین دوغوم گونی دور و نه یاخشی مناسبتی وار بو گون تورک شاعر لرین اربابیندن و امام حسین علیه السلامون نوکریندن ، حاج اکبر خان رزّاقی دن سوز آچا ک .
نئجه اوزومه سوینیرم کی بو اوچومجی ایل دیر کی من حکیم تیلیم خانون عزیز لمه سینده اشتراک ائدیرم و بورادا اوزومه درس اویرنیرم . هامی شرکت ائدنلریمیزه ، شاعرلریمیزه عاشقلریمیزه و عزیز پاسدارلاروموزا وجانبازلاروموزا امام حسین و حضرت ابالفضل دوغومون و پاسدار و جانباز گونینی تبریک عرض ائلیرم .
یارب بو کربلا بو سولان گوللریم منی
قانه باتیب لا نئچّه دلاورلریم منیم
ائتدیم وفا من عهدیمه ای حیّ ذوالجلال
بو تیغ و نیزه بو بدن انوریم منیم /36
ایرانون ، مرکزی بولگه سینین ، ساوه محالوندا ، حکیم تیلیم خان دان سونرا آدلیم شاعری حاج اکبر خان رزّاقی دیر .اکبر خان رزّاقی مین ایکی یوز دوخسان دوقوز جی (1299)گونش ایلینده ، قاراقان اولکه سی ، مصرقان کندینده ، دنیایه گوز آچوب و سنه ی مین اوچ یوز آلتموش سکّیزده دنیادن کوچوب دیر . رحمتلیک دکتر علی کمالی دن صورا بیر کیمسه اونون تانیتماسونا گوره قلم گزدیر مه ییب و آثارین چاپ ائتمه گه ایشله مه ییب . فقط دکتر حسین گونئیلی جنابلاری اونون تانیتماسونا گوره ایکی اوچ مقاله یازوبلاراما بوگونلر خبر یئتیشیر کی حاج اکبرین آقا زاده سی اونون شعرلرین چاپه یئتیشدیرمگده دیر کی اونا توفیق آرزو ائلیریک و تازه لیقده انشاءالله حاج اکبر خانون دیوانین اوخویاجاقوک .
من حاج اکبر خانی شاعر لرین اربابی ذکر ائله دیم اونا گوره کی اکبر خانون هنرلری آیری شاعرلرده یوخدور و اگر واردور آز واردور . ایلک اوکی اکبرخان بیر اخلاقلی ، دئییب گولن ، طنّاز شاعریدی .
ایکینجی بوکی بیر بویوک خطّاطیدی و گلزار حسینی کتابین اوزمبارک ، گوزه ل خطیییدن یازمیشدی . اوچونجی بو کی تاریخ اسلام و کربلانی چوخ یاخشی بیلیردی .
یاحسین ای ز شرف عالم امکانه زعیم
ای ائدن قانی ائله پرچم دینی تشهیم
تشهیم یعنی بو یاماق رنگ ائله ماق
رحمت و لطفون اولور حال جهانه شامل
یئتیریر گون کیمی کل ّاممه فیض عمیم
آدیوی منشی تقدیر و قضا روز ازل
قیلدی عنوان ائله طغرای شهادت تنظیم
ابتدا مدرسه ی عشقیده کلک آلدین اله
خطّ نسخ ایله بلا مشقینی قیلدین ترقیم
مکتب عشقیده تحصیل ائله دین درس وفا
باش و جاندان اوزمان گئچماقا دوتدون تصمیم
دین یولوندا بدنین اوخلارا اولدی آماج
باشیوی شمر دغا قیلدی قفادن تصلیم
تصلیم یعنی بیخ دن کسمک
ائتمه سیدین گر عطش زحمتینه طاقت و تاب
شیعه لر ایچمزیدی خلد برینده تسنیم
ایلدین خشک لسانین ائله دینی ترویج
یارالی جسمین ائله اولکه ی دینی تفخیم
حاج اکبرخان هم عرب دیلین و هم فارس وتورک دیلین استادلوق مرتبه سینه کیمین یاخشی بیلریمیش و بولار کی عرض ائله دیم آثاروندان گورسنیر . بو لارا علاوه حاج اکبر خان و قارداشلاری حاج حیدر و حاج صفدر تمام عمورلری ظالم لرینن مبارزه ده و ساووشما دا گئچیبدیر و مصرقانلولار بو امره یئتیگ دیر لر .
ایندیه کیمین بیز گلزار حسینی کتابین و بیر بالاجا مجموعه ده کی حتی شعر نو دا ایچینده وار و شهید لره گوره ده شعر دئییلیب بو ، بویوک شاعر دن گورموشوک که مرحوم علی کمالی نظری آلتیندا و اونون امکلری نتیجه سینده چاپه یئتیشیب . گلزار حسینی اوچونجی چاپه یئتیشیب و ایکی یوز ایگیرمی بئش صفحه سی وار و ایکی بخش دیر ، بیر بخشی شاعرین قصیده لری و مدیحه لری دیر و بیر شعرینده فانی همدانینین مخمّسینه جواب دئییب .
محبوب دل حضرت خیرالبشرم من
زهرا آنا حیدر آتا والا گهرم من
شه زاده ام و شه منش و شه سیرم من
بیر کوکبم و تابش ایکی قمرم من
من بیر گهرم ایکی گهردن اولا منشق/66
بو شعر لر ایچینده بحر طویل ده گورونور : حضرت عباس شمر جوابینده بویورور
ای دنی زاده ی شیطان صفت مرتد غدار ، جفا کار ، ستم پیشه ی مکار ، ایا ملحد بی شرم و حیا ، مبغض مردود دغا ، منکر آیات خدا ، بد سیر و کم هنر و ریمن ابتر ،. ، ایا فاجر و فاسق ، ستمکارمنافق ، سنن لعنته لایق ، ایا ابله نادان . /88
ایکینجی بولومی دوش وورما و زنجیر وورما شعرلری دیر :
ای حیدریم قارداش
سرلشگریم قارداش
نام آوریم قارداش
گل پیکریم قارداش
عباس نام آور
جنگ آوریم قارداش /176
اوجورکی بیلیریک حاج اکبرخان عمرونون سونونا کیمین حضرت ابا عبدالله دستگاهینده خدمت ائلریمیش و تعزیه ده اوخویاروموش و مخالف نقشین گتوره ریمیش . اما بولاردان سوای طنز شعرلری ، مدنی و سیاسی شعرلری اوزی اوچ جیلده یاخین دیر کی اولاری آز ائشید میشیک و گوز یولدایوک تا تئز لیگه الیمیزه چاتسون . او شعرلرده حاج اکبرخان ، معجز کیمین صابر کیمین ملا پناه واقف کیمین وکریمی کیمین چوخ ائشیدملی و چشید ملی شعر لر بویوروب کی بیریسی واریوخ شعری دیر . حاج اکبرخان ، عرب دانلوقون ، عروض و قافیه ده استادلوقون ، اوضاع اجتماعینی گوز آلتا ساخلاماقون ، ارباب لارون ظلمون ، کندلی لرین ساده لیقین و چوخلی مسایلی بو شعرلرده یازوب و اوزوندن یادگار قویوب که گلن ایللرده اگر عمر اولسا انشاءالله اولارا باره سوز یازاجایوق .
اما عزیز قارداشلار : قاراقانون ، نوبرانین و ساوه بولگه سینین اولدوز لاری بیری بیرینین آردوندا بولود لار آلتوندان چیخیب ، گوز قاش آتولاّر و بیزه امید ونوید وریللر ، بیری ده دکتر خسرو خان امیر حسینی دیر کی تئز لیگه اونون کتابی تیلیم خان و خلج آدوندا چاپه یئتیشیب و یاییملانا جاقدیر . اونا ال آغروماسون دئییریک . داها اوتانماروک و تورک دیلین آزّاد آزّاد دانوشاروک . داها صابرین ، تیلیمین ، اکبر خانون و بوتون شاعرلریمیزین و عاشقلریمیزین قدرین بیله ریک و اولاری باش اوسته وگوز اوسته قویاروک .
اومیدیمیز وارکی تئزلیگه بیزیم منطقه نین شاعرلری اثری ، همچون حاج علی سیفی ، آقای فتح اللهی ، غیبعلی خرقانی، فتاح خرقانی ، مداح خرقانی ، علی رحمتی خرقانی ، آقای رهنما، عندلیب سولی دره ای خرقانی ،قدسی ، خاکی ، محمدی، غیبی ، چراغی ، کریمی ، سلمانی و اولار کی قلمدن دوشدیلر ، چاپه یئتیشسین و حکیم تیلیم خان دئمیشلی قاراقان اوز ماحالینه گوونسین کی بئله اولدوزلاری وار .
اوگون اولسون کی تیلیم خانون فیلمی دوزل سین و شعرلرینین ایکینجی جیلدی چاپ اولسون . اوگون اولسون کی اکبر خانوندا میصیرقاندا دوستلاروموز ون امکی ائله عزیزلمه سینده اشتراک ائدک . اوگون اولسون کی عاشقلاروموزون سسین صدا و سیمادن ائشیدک . انشا ءالله
بورادا اوزومه وظیفه بیلیرم آقای مهندس امیری دن و بوتون قناقلی و احتراملی مرغئی لی لردن و اولارکی بو مراسیمی یئرینه یئتیشدیریللر و زحمت چکیللر تشکور ائلیه م . الینیز آغروماسون و بو شعر سیزین هدیه نیز :
مرغئی ده چیراغ یانار
ایشیقی تا گوگه چاتار
عاشیق اوز جانینی قویار
تورکینی زینده ساخلاتار
شاهسون یا خلج یوخی
آذری یا کرج یوخی
راستا یول دور کی کج یوخی
دیل بیزی زینده ساخلاتار
تبریزین ای بویوک لری
تورکونون گول چیچک لری
شهریارون دئدیک لری
بیزلری زینده ساخلاتار
ای امیری دئییم ساغ اول
ای سیامک دئییم ساغ اول
ائل بیزی زینده ساخلاتار
---------------------------------------
تاغار سینر قاتوق یئره توکولر
ییخیلیر اوستونه قاب یالویانلار
تیلیم خان ای تیلیم خان ای تیلیم خان
منیم آرخام ائلیم جانیم تیلیم خان
گزیب دونیا گئچیبدیر زمانلار
گدای لار بیز لره منت ساتالار
تیلیم خان ای تیلیم خان ای تیلیم خان
منیم آرخام ائلیم جانیم تیلیم خان
گئدیب شهره داها شهری اولوب لار
داها اوز دیللین یئره قویوبلار
تیلیم خان ای تیلیم خان ای تیلیم خان
تغاری بشکند ماستی بریزد
اولار دونیا به کام کاسه لیسان
تیلیم خان ای تیلیم خان ای تیلیم خان
منیم آرخام ائلیم جانیم تیلیم خان
