بویوک تانری آدی ائله
دیلیم منیم دیبیم، ریشه م ،هویّتیم و ملیّتیم دیر .اگر دیلیم کسه لر ، قانومدا یازارام من تورکم . حکیم تیلیم خان ، شهریار ، فضولی ، صابر ، معجز،و باشقا تورک شاعر لر منیم دیلیمین تنه لری ، دایاناقلاری دور لار و منیم دیلیمین شاخه لری ، یار پاقلاری ساییلان دییل و دادلی دادلی میوه لر بو دیلدن دریلماق اولور . تورک لر هر یئرده اولسالار فرق ائله مز . شاهسون تورکی، خلج تورکی ، قوچان و گیلان و اراک تورکی ، تورکمن ، باکولی ، تبریزلی و بوتون آذربایجانلی لر و تورکیه و تورکستان منیم ائلیم دیر لر . تورکون اگر هئچ زادی اولماسا غیرتی وار . آی منیم ائلیم دیلیزه قوربان .
من فیکر ائلیرم ، تیلیم خان ، شهریار، معجز ، فضولی صابر و حاج اکبر خان رزّاقی منیم دیلیمین بیرقین اوجادا ساخلادیب تورک دیلین یاشاتوب لار . اولار بیزیم دیلیمیزین باشقا شاعر لری، سوز یازانی ،یول بیله نی ،فیکر ائلیه نی و دیلیمیزی دوشمن الین دن قورتارانی دور لار .
آرزو ائلیرم وارلیق درگسی هامیسی وار اولسون ،چون کی منیم تورکی اوخوماقوم بیرینجی دفعه ده بو نشریه نین یازی لارویونان باشلاندی اما حییف اولسون کی من بو یولدان آیری دوشدوم و داوام تاپمادی .حکیم تیلیم خانون دیوانی چاپ اولاندان سونرا تازه یو خیدان آییلدیم و گوردوم بیزیم نئجه نئجه گوهر لر و کان لار واروموز:
بیلن لر بیلسن لر من تیلیم خانام بیلمیین لر بیلسین لر گوهرم کانام
اویاندان اوز اوضامیزه باخدوم و گوردوم داها بیزیم بالاجا کند ده قو جا لاردان سوای بیر کیمسه اوز دیلینده دانوشمور . بیزلرده اونا گوره تورک دیلینده دانوشوروک کی بابا ننه میز تورک دانوشولار .بو نا گوره فیکر ائله دیم کی بیز گره ک باشدان باشلیاک و سیز دئمیشلی اگر گج اولسادا گوج باشلیاک و قویمویاک بو شیرین دیلین اجاقی اوچه کی هئچ زمان اوچن دییل .
من فیکر ائلیرم بیزیم اولکه ده هرکنده باش ووراک اوردا بیر شاعر تاپولار اگر شاعر ده اولماسا ، شعر بیلن و سوز بیلن چوخدور . گرک گده ک و بولاری تاپاک و حضور لرینده اوتوراک و دانوشاک و اویره نک . اوجور کی دکتر کمالی بو ایشی گو ره ریمیش و نئجه بویوک نتیجه لر توتد ی .
بیزیم رازقاندا مشهدی رضای امیرحسنی واروموز کی یازوب اوخویان و شاعیر دیر لر .
بیزیم میصیر قان کندینده حاج اکبر خان رزّاقی واروموز کی شعر لری اوجورکی اوستادلر یازی لاروندا اوخوموشام و دکتر کمالی توپلاییب ولی چاپه یتیشمه ییب بئش جیلده یاخین دیر کی آرزو واروموز بیر مرد کیشی الینده چاپه یتیشسین .
الویرده آقای محسنی آدلی شاعیریمیز وار کی الویر دیلینده و فارسیجه و تورکیجه شعر دییئر .کبود کمرده آقای میرزایی آدلی شاعیریمیز وار کی تورکیجه و فارسیجه شعر دییئر و ساویه کوچوب .منجیقاندا آقای رحمتی آدلی واروموز .هر یئره قدم قویاک اوز دیلین سون یازوب ،اوخویان تاپاروک ، فقط گره ک قیچ یولا قویاک یول اوزی آپارار .بوندان سونرا گره ک بولاری تشویق ائلیه ک . باشاردوک اللریندن دوتاک و شعر لرین بوردا اوردا اوخویاک . اولاری نشریه لرده وبلاگ لرده هر یئرده اولدی منتشر ائلیه ک و اوز دیلیمیزه و ائلیمیزه خدمت ائلیه ک .
گچن قورومدا استاد جمراسی حضورینده چوخ یاخچی فایدالاندیم و حاج آقاسیفی شعرلرین سو سوز آدام کیمین ایچدیم و سرمست اولدوم . آقای سلام زاده دن سوزلر اویرندیم و داهادا آتا سوز لریندن دییم لردن داقار جوقوم دولدوردوم .
بو زمانه کیمین آختارار دوک حکیم تیلیم خانون شعر لرین تاپاک و اولاری مجلیس لرده اوخویاک و لذت آپاراک ایندی کی بو حکیمین شعرلری آقای امیری اللرینده چاپه یتیشیب سوز بیلن لر حکمت اوخویان لار و بوتون تیلیم خانون اوجاقوندا ایستی نن لرین وظیفه سی وار بو شعرلر حقینده دانوشسون لار تا تاپولسون کی نییه گوره بو بویوک شاعره حکیم دئییلیب . دوز دور کی تیلیم خان چوخ بیلن دونیا گزه ن و ادبیاتده بیر نابغه انسان دیر امّا هر چوخ بیلنه دونیا گزه نه و شعر یازانا حکیم دئمز لر حتّی فارس ادبّیاتینده حافظ و سعدیه ده حکیم دئییل مییب .
بوندان سونرا حکیم تیلیم خانون بیر تعداد شعرلرینین معناسین اونون شعرین اوخویان لار بیلمز لر و گره ک اولار معنا اولون سون تا هامی شعرلرین دن باشارسون حظ آپارسون .
امّا نیه حکیم تیلیم خانه حکیم دئییلیب ؟: بیزیم قدیم کی لریمیز هر کیمسه کی طبابت ائلریمیش و جسمانی مرض لری درمان ائلریمیش اونا حکیم دییه ریمیشلر . اما گونوز کیمین روشن دیر کی تیلیم خان جسمی مرض لره ال قوشمایوب و شغلی نجّاروموش و اگر دئییری من طبیبم هندوستاندان گلمیشم مقصودی روح و روان مرض لری دیر و هندوستان حکیم لری ده چوخی روحی مرض لرینین اوستاسی دیر لر . بیزیم فارس شاعیر لرینده ده او شاعیر لر کی طبابت ده اللری واروموش حکیم چاقورولمایوب لار .عطار او لارون بیریسی دیر . اما سنایی خیام و آیری شاعیر لریمیز کی دنیانون بی اعتبار لوقوندان و وقتی الدن ورممه قاقدان دانوشوب لار حکیم اوخونوب لار . اوشاعیر لره کی حکیم دئمیشیک بولار دنیا باره سینده ،اولوم باره سینده ،عشق باره سینده ،یاخچی لوقدان ،او دنیا دان، تاری دان ،انبیا و اولیا دن خبر لر وریب لر . بوردا نتیجه آلورام که حکیم تیلیم خان و امثال او فیلسوف دئییلیمیشلر و اوردان کی اهل معرفت و عرفانوموش لار حکیم ساییلیب لار . تیلیم خان اونا گوره حکیم ساییلیب کی روحی درد لره دواسی وار . اونون دوکانوندا حسد و بخل و کبره دوا تاپولار و بویوک دواسی عشق دیر . بو باره ده انشا ء الله سونرادان درین بحث لر ائده جایوق .من فیکر ائلیرم اگر رحمتلیک علی کمالی تیلیم خانی دنیایه تانیتدیریب تیلیم خان ساوه نی نوبرانی و قاراقانی دنیایه تانیتدیریبدیر .
جناب مهندس امیری یولی ایشیق و آلله کومکی اولسون کی بو یولدا امک لری ثمره یتیشیب و انشاءالله او تذکره دن ده کی سوز آچدیلار آیدون لوقا یتیشسین .
اویئردن کی شعر و موسیقی بیر بیریندن آیریلان دییل لر و بیز بو یولدا عاشیقلارونان ایشتراکیمز واروموش و تیلیم خان شعر لری بولاروی سازلاروندا اوخونوب و دنیادا پخش اولوب بو لارون احترامی بیزه واجب دیر و اولاری گره ک تجلیل ائده ک کی ائلیمیزین صدا و سیماسی دیل لر . بوردا عاشیق گونشه ده بویوک تانری دان ساغلیق ایستیریک .
