#همسر_اول
#فرانسواز_شاندرناگور
"سئوگیم نفرتیمه اوستون گلسین دئیه یازدیم"
فرانسوا لا جان بیر قالب اولورام. هر زاد واختیندا قشنگدی. هر زاددان چوخ آدم‌لار. دیلده وارام دئییب آما اولمایاندا یئرینی هئچ نه دولدورماییر. بونو آچیب آغلارتماق اولمور. خیانتدن باغیشلاماق‌لا کئچمک اولمور. یاندیریر کول ائله‌ییر. دانیشا بیلمه‌دن ال آتیرام کاغاذا. سیغینیرام یازماغا. یازیلاریملا خیانتین قارشیسیندا خیانت ائله‌ییرم. اونا دوشونمک یئرینه بیر کتاب یازماغا دوشونورم. یازیرام بلکه سئوگیم نفرتیمه اوستون گله. یازماق دیری قالماق اوچون تکجه ندن. لحظه‌لر، ثانیه‌لر، دقیقه‌لر، ساعات‌لار، گون‌لر، هفته‌لر، آی‌لار، ایللر... سونوندا وارلیغیم رای وئریر اوتانازیا. من اولمه‌لییم. روحوم، آنی‌لاریم، دویغولاریم، رویالاریم... داها کئچمیشده اولان آدام اولا بیلمه‌رم. اونونلا گئدن یئرلره گئده بیلمه‌رم. اونونلا گوروب اونونلا دانیشدیغیم آدام‌لار بیربیر منی آتیب اونا هاپی دورورلار. اورییمین دریسی سویولور. دریسینی سویانلاری آلقیشلاییرلار. خودافیظلشمه‌یه مجال وئرمیرلر. نئجه اینانیم داها سنین آنان آنا سسله‌یه بیلمه‌به‌جیم؟! اوتانازی جواب وئریر. اونجه اولدوغوم آدامی قویلاییرام. اینانیرام اونلار بیرلیکده چوخ بختور اولتجاقلار. او یازیق من سئویب خوشبخت ائله‌یه بیلمه‌دیییم آدامی مندن چوخ سئویب اونون اوچون اوزوندن کئچه‌جک. رویالاریندان، اوزگورلویوندن، هر زادیندان. من کئچه‌مه‌ین زادلاردان. بو اوزدن هله هله آغلامالییام. آما باشقا تهر. بو دونه سئوگیمه سوگوارلیق ائله‌یه‌جیم. آغلاییب گوله‌جیم. خیالیمدا مین‌لرجه قوجاقلاشاجاغام. بیرلشدیییمیز لحظه‌لرده ترومالاریمیزین بیرلشمه‌لرینی گوره‌جیم. منیم تنیمدن سنین تنن، سنین تنیندن منیم تنیمه جالانان آنلاری ذهنیمده دونه‌لرجه گوشه‌یه‌جیم. یادیما دوشنده تنین گیزلی سیررلارینی ایلک اونجه من تاپمیشدیم الیمی اورییمه قویوب آغلایاجاغام. کیسمه‌یه دئییب ایناندیرماغا سوزوم اولمایاجاق. او دا منی بیر گون سئویردی دئییب اونو گوسترمه‌یه الیمده هئچ نه اولمایاجاق. سانکی یازارام یاشامادیغیم خیاللاری یازیرام دئیه اورک یاندیریب سوز بزه‌یه‌جکلر. یازماق ضرریمه اولسا دا یازاجاغام. بو سوگوارلیق اوجون منیم تکجه باجاردیغیمدی. تکجه وارلیغیما سیغینیب اونون اوچون قیراغا چکیله‌جیم. سئوگیمیزی قورومایاجاغام. آرتیق قیراغا قویولدوغومو بوینوما آلاجاغام. تنیم اونون تنی‌مین حسرتیندن هر آی کئچمیش آیدان آرتیق قان آخدیرامدا اوزومو قوجاقلاییب داها تک قالاجاقسان دئیه‌جیم. تنیم بیر داها داغدا داشدا اونون تنیله بیر اولا بیلمه‌یه‌جیی‌مین اینانماغینا بویون وئرنده استحاله‌یه سیغیناجاغیق. داها منیمله او یوخ. منیمله من قالیریق. من داها بیری‌نین یاشامیندا ایلک قادین دئییلم. من آرتیق اولموشم. ایلانلار چالان آجیلارا دوشونمه‌سم دریمی دییشه بیله‌رم. اسکی دریدن چیخیب یئنی آدام اولا بیله‌رم. ایچیمده آغلایان اوشاقلیقلا تانیدیغیم قیزجیغازلا بیر داها یاخین اولا بیله‌رم. اونا سیغیناجاق اولا بیله‌رم. بلکه سئودیییم آدامین ایچینده یاشایان اوشاقلا یولداش اولدوق. هر نه اولورسا اونون گنجلییی، یئنی‌یئتمه‌لییی، اوشاقلیغی بئله منیم گنجلیییمله، یئنی‌یئتمه‌لییمله، اوشاقلیغیملا بویا باشا چاتمیشدی. آرتیق اونون قوجالیغی باشقاسی‌نین دی. منیم قوجالیغیم اوزوموندو.
#مهدیه_پایدار
https://t.me/elmanpaydar13
