#یوزپلنگانی_که_با_من_دویده_اند
#بیژن_نجدی
نئجه آغلاماق باجارمایان منین آغلاتماغینی باجاریرسان؟ سنینله قاچان قافلان‌لار نه اولدولار اوغلان؟ کیمه ارث قالدیلار؟ اونلارا قویدوغون ارث کیمه قالدی؟ قافلان‌لاری رام ائدیب سوزجوکلری رقصه چکن یازار، ندن ایندییه‌دک گلیب منه چاتمامیشدین؟ داها قاچما! بیر دایان! منیم دامارلاریمدا جالان. منیمله دانیشما... گل اورییمده یووا قور، سوموک‌لریمه قفل ووروب جومجولاق سو، ایسلانمیش سه‌شنبه‌ده منی یو...
دایان بیر نفس آل. هئچ خبرین اولدو سونونجو قافلان نئجه اولدو؟ بوتون عکس‌لرینی گوشومدا جیریب سنین ناغیل‌لاریندا یاشاییب اولن ملیحه‌لر ایله طاهرلر ایله مرتضی‌لارین پالتولاری‌نین جیب‌لرینه توکورم. سن ده شعرلرینی منیم شئح چکمیش خاطره‌لریمه یاغدیر. دایان کیمسه‌یه دئمه‌دیییم بایرام آییندان سنه دئییم بیژن. کیمسه اولمادان، منیمله اوزومون بورالاردان چیخیب قاچیب شاخدادان دونموش آلما آغاج‌لارینین، یومولموش گوزلری‌نین اونونده، چیلپاق اولموش بوداق‌لاری‌نین آلتیندا چیلپاق اولماغیمیزدان. نفس‌لریمیزین ایستیسیندن بخارلانیب، دالی شیشه‌ده سنی سئویرم یازیلاریمیزین شئح چکمه‌سیندن... شیشه‌نین آغلاماغیندان... سونوندا... چوخ سونرالاردا دامجی دامجی گوز یاشی توکوب گئت بورالاردان دئمه‌ییمیزدن...
ناغیل‌لارین شاعیری منیمله دانیش. بیر داها دایان سوزلریم قورتاران دئییل بیژن. چییینلریمدن یاشامین یوکو گوتورولن دئییل. حیکایه‌لرینده اوریی یارا آت منم. سوزجوکلره اورک باغلاییب یارالاریمی اونلارا تاپشیران نقاش دا، نقاشی دا منم. کیشنه‌ییب آغلاییرام. دیزلریم یئره چوکولور. علی دئمیشکن فیکیرلر بئینیمی سؤکور. آبا گلیر گؤزومون قاباغینا. سؤکولورم.
#مهدیه_پایدار
