عید نوروز یتیشوب با هم اولوپ لیل و نهار
خوابیدن بیدار اولوب دشت و دمن لاله سی وار
بوته گؤلده اوخور خوش سسیله بلیل زار
گلشنی سیراب ائدن ابریله باران یتیشوب
گؤیلومی شاد ائلین فصل بهاران یتیشوب
لاله زار اولدی چمین یتدی بیزه بوی بهار
جست و خیز ائلری چون دشتیده آهوی بهار
روحیمه وردی صفا چهره مینوی بهار
هم نشین یازدا اولان بلبله زیبا گؤل اولار
اوخویان عشق سرودون گؤله ده بلیل اولار
گلشنه اسدی گینه باد نسیم وئردی صفا
قوتاروب فصل سویوق معتدل اولدی جو هوا
لطف ائدوب ورسه منه عمر اگر بس که خدا
بو گلن نوبهاری شوقیله من درک ائلرم
گؤیلومی غصه و غمنن داخی من سیلگرم
او مهاجر قوش اولان گلدی دوباره وطنه
آهولار سیره چیخوب کوهیله دشت و دمنه
گؤزومه نور گلیر من با خانادا گؤل چمنه
گؤزلریم گؤرسه اونی شاد و خرامان اولاچاق
گلشنی زیبا ائدن بلبل خوش خوان اولاجاق
بستر خلقت هامونی واله و حیران ائلیوب
بیرینی شیر ائلیب بعضینی جیران ائلیوب
هامی خلقتده فقط بیزلری انسان ائلیوب
بیزی انسان ائلماقدان نئدی مقصود گؤرسن
خلقته سن باخاسان خلقته معبود بوله سن
گلشنه باخسان اگر فضل بهار فریاد اولار
هامی مرغان او زمان جمله عروس داماد اولار
تمام انسانلار اوگون شوقه گلوب دلشاد اولار
کهلیگین قهقه سی روحه نوازش ائلیری
گؤله خار یولداش اولوب خاریله سازیش ائلیری
سیر ائله گلشنه سن بیر جه بهاردا گؤله باخ
چیخگلان داغلار سن بیر ده دونوب سن چوله باخ
اریئن قارلار باخ داغدان آخان سن سیله باخ
گئل شکوفا اولونان دشتده سن گلشنی گؤر
گئل کیچک یاز ائلین سبز اولان کفشنی گؤر
چشمه لر جاری اولوب گلزاری سیراب ائلیری
نور خورشید یتیشوب گلشنی شاداب ائلیری
گؤل ستاندا گؤل آچوب عطرینی پرتاب ائلیری
عالمی خوشبو ائدر عطر گل و ریحانلان
چؤلده آهوده گزر قوچ قویون جیرانلان
عالمه من باخورام فکریمی حیران گؤرورم
بهارا من باخورام عالمی رضوان گؤرورم
بو غلط سؤزدی دئدیم رضوانی هاردان گؤرورم
رضوانی من گؤررم قرآن گر ادسم عمل
اوندا کی دار فنادن آپارا پیک اجل
بو جهان جنته گئدماقدان اوتور بیر پل اولار
جنته گتماق عزیز چوخدا چتین مشکل اولار
بو جهانون هاموسی جنت اوچون بیر گؤل اولاد
جنتی خلق ائلیوب خالق یزدان بیز اوچون
بیر مسلمان عزیز صاحب ایمان دؤز اوچون
گلشنه من باخورام هر گؤلی چوخ خوش گؤرورم
قدرت خالقینن عالمی منقوش گؤرورم
شاخه گؤلده اتورموش بسی خوش قوش گؤرورم
آللها ذکر دییر اؤز دلینن وقت سحر
درک ائدر تسبیحنی قدرت گوش اولا اگر
توکجک ابر بهار گؤزلرینین اشک ترین
بزییر دشت و دمن لاله لرین مثل گلین
فرش خضرائیله پوشش تاپاجاق فرش زمین
گلستان ائیله جاق فصل بهار هر دره نی
ائلرم حظ گؤرم من او گؤزل منظره نی
گؤل آچار باغدا درخت هلو، هیوا و انار
یئل اسوب شانه وورار سنبله چون زلف نگار
شاد ائدر قلبیمی خوخ غم ائونی بس که یخار
پر آچوب پرواز ائدر گلشنی پروانه گزر
هر گؤله چاتماق همین عطرین آلوب اؤزدن اوپر
یاز گئلوب هر آغاجون پیراقی وار یا گؤلی وار
مرغزارون گؤرسن هر جوره قوش بلبلی وار
هر گیاهیله قوشون اؤزلرینین بیر دلی وار
اؤز بیانیله دییر حمد و ثنا خالقه او
عشق درسین وریری عاشق اولان عاشقه او
بهارون گلماقونی بلبله گل مژده وریر
گلشنه عشق و سرور بلبل شوریده وریر
نیش خار چوخلی اذیت گؤله هر یرده وریر
ژاله گؤلده اتوروب گؤلده طرارت یارادوب
چمنه بلبل و گؤل چوخدا وجاهت یارادوب
عشقونی بلبل شیدا گؤله ابراز ائلیری
گؤل آلوب بلبلی آغوشه ولی ناز ائلیری
چون گوروب یوخدی جواب گؤلدن او پرواز ائلیری
هر گؤله قوندی ولی مطلبینه چاتمادی او
لیک عاشقدی گؤله معشوقونی آتمادی او
آخره یتدی گینه قار سویوقون مسئله سی
گلدی هجرت ایلین نوبهارون چلچله سی
دهقانون اکماق اوچون شوقه گلوب حوصله سی
هر جوره میوه و آذوفه بیزه چولده اکیر
حاصلی بهره وئره کشتینه چوخ دقت ائلیر
چیخ چؤله فصل بهار دوست عزیز اول سال
چشمه لردن آخوری گؤر نه گوزل آب زلال
گؤرونور چوخلی طبیعتده اولان جاه و جلال
داغلارا من باخیرام داغلاری الوان گؤرورم
هر یانا من باخیرام جلوه یزدان گؤرورم
یاغدی رحمت یاغیشی اولدی جهان باصفا چوخ
چیخدی خورشید طلا اولدی چمن دلربا چوخ
ارغوان گؤلر آچوب دشت و دمن خوش نما چوخ
گئل تماشا ائله سن صحن گلستانه عزیز
گؤرنئچه روح وریری خسته اولان جانه عزیز
گون دوشوب، قار اریوب رشد ایلیوب داغ تره سی
اوتوری داغدا گینه قوچ قویون آغ قره سی
روحیمی زنده ائدیر داغ دره نین منظره سی
بچه آهولره باخ گؤر نئجه داغلاری قاچار
کهلگین جوجه لری داغدا گزر داشدان اوچار
کائنات خلق اولوب جمله سی انسانان اؤتور
یارانوب کل بشر مکتب عرفانان اؤتور
عرفا خلق اولونوب خالق سبحانان اؤتور
خلق ائدیب انسانی او خالقه احسن بویوروب
شیطانی انسان اوجون بیر یکه دشمن بویوروب
عالم خلقت اوچون زیبا طبیعت گؤرونور
هر گؤله من باخورام گؤلده لطافت گؤرونور
او طبیعتده گؤزه یاخشی طراوت گؤرونور
او طبیعت او طراوت او لطافت تمامی
خالق خلقتینن آشنا ائلیر آدامی
روشن اد داغدا گینه کاهلان کؤل کؤس اؤتونی
سالگلان چایدانا سن دم چکه کهلیک اؤتونی
ساغگلان بوزکچنین امجگونون سن سؤتونی
قوی اوجاق اوسته پیشه حاضر اولا تا نهارا
میل ائله لذتیلن شکر ائله پروردگارا
تقصیریم چوخدی خدا عرضیمی سن ائله قبول
التماس ایلیریم لطف ائله سن ایتمه ملول
عفو ائله بیزلری سن حرمت او ختم رسول
باغلیوب چشم امید رحمتیوه شعریازان
ائدگله احسان اونا ویرگله جنتده مکان
بو گئلن یازدی وئریب چوخلی صفا هر دیارا
گیردی زیبا خلعتین اولادی شبیه بیر نگارا
سویله سن حمد و ثنا خلق ایلیی کردگارا
خلق ائدوب بیزدن اوتور کل جهانون هاموسون
اعلمی تا بو بشر خالق سبحان تانسون
