گلدى جهانا شیرخدا یار محمد
تاپدی صفا چوح گلشن و گلزار محمد (ص)
اولدی علییه زادگهی کعبه یزدان
گلموب جهانا گلمیه جاق بیر بله انسان
مولود علی قریدی تمام عالمی حیران
دنیانه گلوب یار وفادار محمد(ص)
گلزار امامتده آچوب بیر گل زیبا
بیر گل دى على او گله یوخ دنیا دا همتا
عطرآگین اولوب کون و مکان هر ایکی دنیا
خوش خوی جهان نایب دیندار محمد(ص)
خادمدی علی مادرینه هاجر و سارا
نور علی دن روشن اولوب عالم بالا
پیغمبره تبریک بویوروب خالق یکتا
قویدی قدمون کعبیه پاسدار محمد(ص)
دنیایه گلوب اسوه ایمانیله تقوا
رهبردی علی عالم اوچون رهبر تنها
داماد پیمبر دی علی همسر زهرا
پیغمبره جان روح و روان ثار محمد(ص)
قویدی قدمون سطح جهان اوسته چو حیدر
نور علیدن کل جهان اولدی منور
چوخ خرم و شاد اولدی اوگون ختم پیمبر
نورانی اولوپ چهره گلنار محمد (ص)
اجرا اده جک حکم قرآنی او جهاندا
امداد اده جک دینه علی، برهه زماندا
چوخ یرده علی ساخلیاجاق دینی اماندا
وار نزد علی رازیله اسرار محمد(ص)
او دینله پیغمبره چوخ حامی و غمخوار
مشکل لری آسان اده جک حیدر کرار
شمشیر علی دن اده جک واهمه کفار
نابود اولاجاق دشمن غدّار محمد(ص)
پیروز علی دی جنگده چون شیر خدا دور
او جود و کرم صاحب احسان و سخا دور
منکر علیه دینی اونون پوچ و فنا دور
تایید ادیری مطلبی گفتار محمد(ص)
عالملری روشن ایلیوب نور و ضیاسی
مبهوت ایلیوب دنیانی چوخ صدق و صفاسی
ثابت جهان اولدی انون عهد و وفاسی
گلدی جهانا مونس و غمخوار محمد(ص)
تعیین ایلیوب آد علیه خالق داور
قویدی او آدی نوزاد اوچون شافع محشر
تقسیم جنان دوزخ و هم ساقی کوثر
تکمیل دینه یاريله انصار محمد(ص)
عالملره عالِم دی علی عارف دانا
هر دانش اوچون روشن علی آگاه و بینا
بیردی علي یه ارض و سما دانش عقبا
علم علی دن پخش اولوب اخبار محمد(ص)
گلدی جهانا نوری ادیب عالمی روشن
مظلومه اولوب یار و معین ظالمه دشمن
عدل علی دن عالم اولوب باصفا گلشن
اولدی نبی یه دنیادا دلدار محمد(ص)
حق علی یه ظلم ایلیوب اهل شقاوت
دشمن علینین حقینه چوخ ادی خیانت
پیرو علی یه هر کس اولوب تاپدی سعادت
بو مطلبه شاهد اولی اقرار محمد(ص)
حق علی نی قیلدی بیان خالق سبحان
تعریف ایلیری خوش عملین آیه قرآن
تا روز قیامت اولاجاق حقی نمایان
بو حقی بیان چون ادیر اظهار محمد(ص)
غصب ایلدیلر حقینی چون قوم منافق
اولدی نچه ایل خانه نشین قرآن ناطق
قویموبلا دوا درده اده دکتر حازق
قل بسته ادیب حیدری اخطار محمد(ص)
ال ذوالفقارا ورمادی او اولدی شکیبا
چوخ ظلم اولونب حیدره چون گوردوله تنها
آئین خدا حفظ اولا تا دوزدی او مولا
تا زنده قالا دنیادا آثار محمد(ص)
اسلام و دینه با دل سوزنده علی دور
خندق گونی اسلامی ادن زنده علي دور
خیبر فتح اولوب فاتح ارزنده علی دور
خیبر ده علی تنها علمدار محمد(ص)
معراجه گدوب گویلره چون ختم پیمبر
با لحن علی صحبت ادیب خالق داور
هم صحبت اولوب گویده اوگون فاتح خیبر
آسوده اولوب عرشده افکار محمد (ص)
ای اعلمی یاز عشق علی ده گوزل اشعار
فرصت دی اله گلمویاجاق بیر بله بازار
ترک ایلیه جاقسان جهانی بیر گونی ناچار
تا یولداش اولا شعر علی یار محمد(ص)
