اون سگیز ذیحجه گلوب عید غدیر دی
اسلامه اولان بیرجه بیوک عید کبیر دی
دینایه علی سرور اولوب تنها امیر دی
نصب اولدی علی ولایته چادی مقامه
تکمیل ایلدی دینی نبی یدی مرامه
دستور خدا اجرا اولوب شادی پیمبر
مقصوده چاتوب ختم رُسُل شافع محشر
نایبدی علی شاه ولا فاتح خیبر
تائید ایلیوب مطلبی حجاج معظم
تثبیته چاتوپ دنیادا بو نهضت اعظم
رهبر هامویا اولدی علی حجت یزدان
محبوب پیمبردی علی عاشق جانان
عشق علی دی عالم اولوب عشقینه حیران
عشقینده علی دنیادا ثابت قدم اولدی
علت اودی که عشق علی عالمه دولدی
عالملری حیرت ده قویوب عدل و سخاسی
روشن ایلیوب عالمی چوخ نور و ضیاسی
مبهوت ایلیوب دینه اولان عشق و وفاسی
دنیا ده علی عشقینه بیر عشق تاپولماز
بیر گل دی علی گلشن آرا هیچ وده سولماز
عاشقلری چوخ عشق علی ده نظر ایلر
راه و روش عدل علی ده گذر ایلر
دقت له باخا خلقینه چوخ چوخ اثر ایلر
اوندا اولاجاق شیعه سی چوخ صاحب تقوا
تقواسی اولان شیعه سینه لطف ادی مولا
علم علی دی وار نفوذی ارض و سما ده
دریای عظیم دی کرم و جود و سخاده
بیر شمع هدایتی علی راه خدا ده
نورون دی علی روشن اولوب عالم امکان
نور افشان اولوب نوریونان کشور ایران
سن فضل و عبادت ده علی تنها بشر سن
بیچاره و ایتامه اولان یاخشی پدر سن
ظلم و فسادون ریشه سینی سن ده کسر سن
ای فضل و کرم دنیاسینا ماه درخشان
ای کان شجاعت گویونه خورشید تابان
موسایه ندا گلدی گده طور سینایه
لیک دیدی موسی اوگون حق بو ندایه
پیرولاری باش سیز قالا عرض ادی خدایه
تعین ایله هارونی منه نایب الهی
تا من گلنه قوما اولا صاحب الهی
موسی گدیری بیر آیا چوخدا نگران دی
بو امر خدا موسی اوچون آجّا زمان دی
فرمایش ادیب قارداشینا قارداش امان دی
سعی ایله داداش نایب من جان عزیزیم
تولانمیا شیطانه گوزل قوم ضعیفیم
موسی ده گدیب گلدی ولی آجّا یوبان دی
شیطان لعین وردی فریب قومی اینان دی
تهمت موسویا وردی دیدی موسی یالان دی
هارونون اوگون قالمیشدی الده یاخاسی
تا گلدی نجات وردی اونا موسی اخاسی
موسی ده گلیب قومی گوروب دین اوزاق دی
قومون آراسین دا ایلین حکم نفاق دی
بیر آجّا نفر صاحب دین دینه دایاق دی
گوساله سامری قویوب چوخلی اثرلر
گوساله پرست اولموشدی چوخلی بشرلر
موسی یه ولی تعین ادیب خالق سبحان
پیرولارینی تولامیا دشمن انسان
ممکن دییر بی نائب اولا ختم رسولان
نائب دی علی ختم رسولانه یقین بول
فکرین چکیر آلله اوزی سن حتم یقین بول
الله اوزونه ادی ولی شیر خدانی
اجرا ایلیه تا که علی حکم قرآنی
پیرو بویوروبدی علی یه اهل جهانی
لازم دی بیزه تا علی یه اولسون اطاعت
تا روز جزا ادسون علی بلکه شفاعت
انگشتره قیمت ورچک گر نگین اولسا
آئین پیمبر قالاجاق جانشین اولسا
بو شرطیله که جانشینی اهل دین اولسا
گلزار دینی ایستیه گر با صفا اولسون
دین گلشنینه صاحب دین پیشوا اولسون
قرآن سوزو دی ای گوزلیم بول یالان اولماز
بی جان امام حتم و یقین بول جهان اولماز
گر اولماسا دنیا ده امام هیچ قالان اولماز
دنیانی بوگون ساخلیان عالم ده امام دی
حجت دی امام پیش خدا والا مقام دی
موسی گدیری طوره ولی تیز گله جاق دور
اما که نبی دار فنادن گده جاق دور
تکلیف ندی امت گینه باش سیز قالاجاق دور
باش سیز قالا بولمز که یقین امت اکبر
لازم دی اولا امت اوچون هادی و رهبر
گر پیشوایی سوی خدادن اولاتیانی
گر پیشواسی سوی خدا دن اولا تعیین
دشمنلرینین کاری اولار مشکل و سنگین
او قویمویاجاق گلشن دین تا آتا رنگین
ای اعلمی شکر ایله گلن الله دائم
پیغمبره نایب دی الان حضرت قائم
