نگران اولما اورک دردیوه درمان گله جک
قوتاروب فصل خزان فصل بهاران گله جک
گلشنی سیراب ادن شبنم و باران گله جک
توکجک اشک ترین گلشنی سیراب اده جک
دلربا گلشنی چوخ بلبل شیدا اده جک
گلجک عصرین امامی بیزی دلشاد اده جک
کاخ ظالملری او عدلیله برباد اده جک
دولت مهدینی او دنیادا ایجاد اده جک
انتظار شیعه چکیر منجی عالم گله جک
گوزلری یول دا قالوب وارث خاتم گله جک
انتظار من چکیرم تا شب یلدا قوتولا
ظلمت ظلم دن عالمده بو دنیا قوتولا
عالمه صاحب اولان تا گله غوغا قوتولا
بیر جمعه منتظرم تا گله بیر گون بو خبر
تا سعادت تاپالار عالم آرا جمله بشر
شیعه نون وار امیدی تا هدفی حاصل اولا
نور حق ظاهر اولوب ظلمت کفر زایل اولا
هامی خوشبخت و سعید اهل جهان فاضل اولا
عالمی روشن ادن ماه منیر آختاریرام
بو جهان ایچره اولان تنها امیر آختاریرام
بیر گوزل آختاریرام دنیا دا یوخدی اوتای
گون خجالت چکیری نورونا شرمنده دی آری
انتظارین چکیرم ایل بویی هر گونده هر آی
گلسن گلشن آرا من گل زیبانی گورم
سن گلنن سورا من وضع بو دنیانی گورم
شب تاریک گده جک او صبح صادق گله جک
جمله روحی مرضه دکتر حاذق گله جک
هامی شاهلار دا گدیب رهبر لایق گله جک
دنیا عدلیله دولوب قالمالی دوران اولاجاق
هامی تکمیله چاتوب دوغری مسلمان اولاجاق
عالمه سرور اولان او شه خوبان گله جک
لنگر کون و مکان حجت یزدان گله جک
هادی کل جهان راه درخشان گله جک
طالب نورم و من صبح ظفر آختاریرام
مصلح و صاحب شمشیر دو سر آختاریرام
نصف شعبان دا گلوب نوگل نرگس جهانا
عالمی خوشبو ادیب زینت اولوب گل ستانا
تهنیت عرض ادیرم عاشق صاحب زمانا
قدمی اولدی مبارک جهانا وردی صفا
نوری روشن الدی عالمی چون نور خدا
خالقه حمد و ثنا حجت یزدانه سلام
عالمه سرور اولان غیبتوه یوخدی دوام
لطف ایله شیعه لر ایله گنن سن ده قیام
شیعه نی آزاد ایله ظلم و ستمنن گَل آقا
بیزلری ایله خلاص غصه و غمنن گَل آقا
گلگینن عصرین امامی سنه قربان بیز اولاخ
پیرو خط علی بنده یزدان بیز اولاخ
سن سون شیعه اولوب صاحب ایمان بیز اولاخ
تا ظهور ایلیه سن قرآنی اجرا اده سن
دنیانی اصلاح ادیب عهدیوه ایفا اده سن
نیه چاتمور هدفه شیعه لرین چوخ دعاسی
نیه غیبت ده قالوب درده درمان دواسی
نیه گلمور جهانا شیعه ارین بس آقاسی
بو عمل منده که وار گلمه جاقدور جهانا
گله ممکن دی اگر پیرو اولام من قرآنا
ایسته ساق عصرین امامی گله غیبت دن اگر
ظلمت ظلم دن آزاد اولا تا اینکه بشر
لطف اده خالق یکتا ایلیه بیرجه نظر
بیزلره لازمه دور متقی انسان بیز اولاخ
پیرو دین مبین تابع قرآن بیز اولاخ
ای خدا لطف ایله سن سوء عملی ترک ایلیاخ
خیر عمل ادماقیلان تا اونی مدرک ایلیاخ
لایق انسانلار اولوب خدمتنی درک ایلیاخ
زندگانلوق او زمان شیعه لره لذت اولی
سربلند دو جهان شیعه اوچون عزت اولی
تا که آماده اولا منجی عالم گله تا
اذنی خالقدن آلوب حضرت قائم گله تا
عدلی گسترده ادیب قاتل ظالم گله تا
عالمه گلماقیلان صلح و صفانی گتوره
جمله ظالملری او سطح جهانان گوتوره
سن گلنده گله جاق عالمه چوخ صلح و صفا
اولاجاق زایل اوگون کفر و فساد زور و جفا
نور باران اده جک عالمی چون نور خدا
دنیانی روشن ادن ماه منور گله جک
قرآنی اجراء ادن شبه پیمبر گله جک
سن گلنده تاپاروق دنیا دا بیز جاه و جلال
ایچروق آب حیات زایل اولار دلده ملال
عالمی مبهوت ادر خورشیده بنزر او جمال
عالمی خوشبو ادن مشکله عنبر گله جک
عدلی برپا ایلین وارث حیدر گله جک
باباسی گلدی اولوب عالم اوچون میر هدا
ددی لبیک اونا چوخ دنیادا مردان خدا
قبول ادی دینینی دنیادا شاهیله گدا
حیف اولا اولمادی دنیاده هامی صاحب دین
سن گلنده اولاجاق جمله جهان اهل یقین
گلشن ایمان اوچون بیر گل زیبا گله جک
مصلح کل جهان یوسف زهرا گله جک
قرآنون حکم لرین ایله اجرا گله جک
قاتلان شه دینین اوگونی قان آلاجاق
پیرو خط حسین شاد و خرامان اولاجاق
غیب دن گل جهانا شیعه گوره صورتیوی
جهانا ولوله سال دنیا بوله صولتوی
کفری نابود ایله سن دنیا بوله قدرتوی
سرفراز شیعه اولا عالمه رحمت یتیشه
مفتخر عاشق اولوب دشمنه ذلت یتیشه
گر وره اذن خدا عالمی روشن ایله سن
عشق و ایثار گل آچا عالمی گلشن ایله سن
عشق بیماری منم عاشقی دیدن ایله سن
گلرم معشوقوما عشقمی اظهار ایلرم
هستی جانیمی تا معشوقا ایثار ایلرم
گر صلاح اولسا خدا ورسن اجازه گله او
دردلره درمان ادیب، چاره اده مشکله او
عدلی گسترده ادیب ظلم و فسادی سیله او
تا که بو اهل دینون قلبلری روشن اولا
مفتخر شیعه اولوب، خوار و زبون دشمن اولا
منتظر عشق یولوندا که نگاریم گله جک
گوزلریم یولدا قالوب معشوق و یاریم گله جک
چاتاجاق آخر قیش فصل بهاریم گله جک
تازه گل لر آچاجک گلشن ایمان دا اوگون
چوخ طراوت تاپاجاق مکتب قرآن دا اوگون
گلمسه یاریم اگر چوخ اولاجاق محنت دل
چاتماسام خدمتنه دلده قالار حسرت دل
نوری روشن دی اورکده اولوری زینت دل
غم یمه اعلمی سن عمرون اگر اولسا تمام
یتیره خدمتینه شعرین اوغول بول که سلام
