ای اولان ماه خدا صاحب احسان رمضان
ای اولان قرآن اوچون فصل بهاران رمضان
ای که انسانلاری عالمده خدا جو ایلین
متقی شخص لری صابر خوش خو ایلین
ای گلستان دینی دهر ده خوش بو ایلین
گلشن دینه اولان خورشید تابان رمضان
قلب لر روشن اولوب نور خدائیله بو آی
عالمی چولقالیوب صدق و صفائیه بو آی
اوخونور لفظ خدا زیبا صدائیله بو آی
آسمان دین اوچون ماه درخشان رمضان
درب جنت آچولوب معتقد انسانلا اوچون
ماه رحمت یتیشوب جمله مسلمانلار اوچون
قورولوب بزم خدا آللها مهمانلار اوچون
بزم الله دا ادن بیزلری مهمان، رمضان
ای بشر سعی ایله سن بزم خدا ده قوناق اول
بو قوناق اولماقیلان سن ده گنه دن اوزاق اول
قرآنون حکملرین گوزلیم هم ایاق اول
دوز یولا رهنمادی بیزلره قرآن، رمضان
اللهون واردی بو آی بیزلر چوخلی نظری
اللهون رحمتی حیران ایلیوب بیز بشری
وقت افطار دا گذشت ایلیری میلیون نفری
باب جنت آچلوب سفره احسان رمضان
اللهون امرینه باخ ایله اطاعت گوزلیم
وقت فرصت دی عزیز ایله عبادت گوزلیم
سعی ایله قرآنی چوخ ایله تلاوت گورلیم
بیره مین اجر ورر خالق رحمان رمضان
ليله القدر بو آي ایچردى اى متقیان
ليله القدر له صیقل تاپوری روح و روان
چوخلی انسانلار اولوب بو گجه ده اهل جنان
ای اولان باب جنان روضه رضوان رمضان
باغلانوب درب جهنم بو گوزل آیدا بلی
باغلیان اولدی بو آی بنده لرین دوز عملی
دوز عمل باعث اولوب اهریمنین سندی بلی
ایلیری ناله بو آی دهرده شیطان رمضان
نصف ماه رمضان لطف ایلیوب خیر الانام
علی وردی اوغول الله امام اوغلی امام
او شهنی آدی حسن دور لقبی مجتبی نام
چوخلی شاد اولدی اوگون ختم رسولان رمضان
خط شیطاندا گدیب اللها عصیان ایلمه
اودا یاندیرما اوزن داخل نیران ایلمه
سعی ایله سن اوزوی دشمن یزدان ایلمه
دشمنین داخل ادر دوزخه یزدان رمضان
ای بشر قدرینی بول رحمت یزدان آییدی
بیزلره لطف و کرم بخشش و غفران آییدی
هامی آیلاردان عزیز صاحب احسان آییدی
ای اولان انسان اوچون موجب غفران رمضان
هر نفس که چکوسن بیر دنه تسبیح دی سنه
یاتماقون عین عبادت اولوری چون حسنه
آچولوبدی بو آیی درب جنان سنله منه
بحر غفرانه اولان درّ له مرجان رمضان
جیرئیل گتدی بو آی قرآنی بس انسان اوچون
آشنا انسان اولا دینله تا ایمان اوچون
تا عبادت ایلیه خالق اولان یزدان اوچون
سنه مدیوندی بوگون دائماً انسان رمضان
بو سعادتدی بیزه بیزلری انسان ایلدون
بزم الله دا بیزی هر گونی مهمان ایلدون
متقی شخص اولوب قاری قرآن ایلدون
ادمسون چوخلارینی سنده مسلمان رمضان
بس که بیزلر قوناقوق خالق داداره بو آی
شیطانون بندلرین بیز ده اداق پاره بو آی
غرق دریای گناهوق ایلیاق چاره بو آی
مرض روحون اولان دردینه درمان رمضان
تولکولر حیله ادیب کوفه ده ضیغم علیه
سجده ده وردی قلیج زاده ملجم علیه
شیعه لر باتدی غمه توتولا ماتم علیه
فیض عظمایه چاتوب او شه مردان رمضان
دیدی شمشیر باشینا محرابی خونین ایلدی
گل جماله قان آخوب قانیله رنگین ایلدی
شیعه نی دنیا بویی دنیادا غمگین ایلدی
گلشن شیعه ایچوت سو ییرینه قان رمضان
چاتدروب فیضه بو آی شیر خدانی شقی لر
غم فزا ایلدیلر کل جهانی شقی لر
ماتمه چولقادولار کون و مکانی شقی لر
او سحر اولدی علی قانیله غلطان رمضان
بیر قلیج وردی شقی قانیله غلطان ایلدی
آخدی قانی او شاهون محرابون الوان ایلدی
یرینن گوی آراسی جبرئیل اعلان ایلدی
شه دین اولدی شهید دینینه قربان رمضان
عید فطرون یتیشوب جمله مسلمان شاد اولی
زکات فطره وروب یوخسول اوچون امداد اولی
نماز فطری قلوب اودان اوگون آزاد اولی
بیزی آزاد ایلین دوزخ و اودان رمضان
ای اولان خالق عالم بیزه رحمان و رحیم
ای اولان صاحب لطف و کرم و جود عظیم
عفو ایله بیزلری سن خاطر قرآن کریم
تا اولا حشر گونی بیزلره آسان رمضان
بیزلری عفو ایلیوب موجب غفران ایله سن
سن عنایت ایلیوب صاحب ایمان ایله سن
لطف اله بیزلره الله بیزی مهمان ایله سن
بو تقاضانی ادیر اعلمی هر آن رمضان
تقوی کسب ایله دلا آخره چاتدی رمضان
توبه سن ایله گلن توبه نی سندرما دایان
مسکنین روز قیامت اولا تا باغ جنان
حوری همسر وره تا خالق جانان رمضان
منزلون قصر اولوری جنت آرا والا مقام
همسرین خوش صفت و خوش روش و زیبا کلام
بو مقامه یتیرن اولدی سنی عالی مرام
چاتدرار عالی مقامه بیزی ایمان رمضان
حجابی حفظ ایله ای صاحب ایمان باجیلار
غیبتی ترک ایله سن تابع قرآن باجیلار
تا کی راحت اولاسان داخل رضوان باجیلار
تا که فردوس دا اولا همسرین غلمان رمضان
