ای خادم اولوب دلسوز اولان ملته افراد
ای مسئول اولان ملتی سیز ائلیون ارشاد
دنیاده گؤروم خالق ائده سیزلره امداد
امداد ائده سوز سیزده بوگون قوم ضعیفه
لازمدی سیزه تا اولا انجام وظیفه
خدمت ائلیون ملته چوخ با دل سوزان
سیزلر سیز عزیز معتمد و صاحب ایمان
ملت دی تیکیب گؤز سیزه هر وقتیله هر آن
ناظردی سیزون ایشلریزه خالق سبحان
الّهی گؤروب رهنما اولسون سیزه قرآن
قرآنه قسم یاد ائلدوز دوز گئدسیز سیز
دوز گئدماقیلان حق یولونی تا گؤره سیز سیز
تا حقی گؤروب باطلی یکسر ازه سیز سیز
بو مطلبی من عرض ائلیرم اولگلان هوشیار
بیدار سن اول مردمه چوخ ایلمه آزار
دنیا گئدیری بیر گون اولار سنده اؤلرسن
عزرائیلی سنده باشون اوستونده گؤررسن
ظلم و ستمون سن جوابون اوندا دررسن
قبری یادوا سالگلان زور دیمه خلقه
بیر گون اولاجاق جان یتیشر سوراخ حلقه
ای میز دالوسوندا اوتوران دوست گرامی
حفظ ایله گلن عدل و نزاکته نظامی
قدرت اؤزوه بولمگلن پست و مقامی
بو نهضتمه ورماگلان ضربه سن الله
غم اوخلارونی ساچماگلان قلبه سن الله
مینلرجه آخوب قان شهید وضع دگر اولسون
بو ملت مظلوم اوچون بیر ظفر اولسون
ظلم ائیلمه ظلمیله آخان قان هدر اولسون
مظلومون آهی تا که گئدر عرش برینه
آهلاردی سنی تا سوخاجاق قمر زمینه
لطف ائیله گلن بیزلر، ای صاحب الطاف
تا بیزده اولاخ بار خدا صاحب انصاف
تا منصف اولا صاحب هر شغل و هر اصناف
انصافی رعایت ایلیاق با دل آگاه
تا شامل اولا لطف خدا ملته آنگاه
بیر عده کؤنزدی گوزلیم چوخدا او کالدی
قاندیرماق اؤنی چوخدا چتین چوخدا محالدی
ظاهرده او انساندی ولی باشماقی نالدی
هر قدر فشار سن ورسن دؤز یولا گئدسون
هوش ائیلمیری فکر بودی ساغ سولا گئدسون
انصاف و مروت گوزلیم دینده دی بول سن
انصافی اولان دنیادا پاینده دی بول سن
انصافی اولان اؤلسده گر زنده دی بول سن
انصاف هامویا لازم ملزومدی عزیزیم
انصاف سوز اولان دنیا دا مذمومدی عزیزیم
انصاف و مروت یوخدی شمر دغاده
کسدی امامون باشینی او کرب و بلاده
انصاف آتینا مینگله سن قالما پیاده
انصاف آغاجون غرس ائلین اهل یقیندور
علت اؤدی که میوه لری چوخدا شیریندور
انصاف گؤلونی اهگینن سن قلبیده دوشده
تا رشد ایلسون نور خدائیله اؤرگده
انصافی الینن گؤزلیم ورمه هر ایشده
انصافون اگر سولسا گؤلی ظلم اده جاقسان
ظلم ادسن اگر دوزخه سنده گئده جاقسان
بو ملتی آزرده ائدن انصافی یوخدی
بی انصاف عزیزم بو جهاندا ولی چوخدی
نامردین ایشی ای گؤزلیم قلبیمه اوخدی
دیدیگجه منیم قلبمه اوخ قلبیمی دورار
نامردین ایشین گؤرسم اگر غم منی چولقار
انصافی اولان حکم خدایه اولی آگاه
انصافی اولان ظلم ائلمز بیر کسه والله
ناانصاف اولان درده علاج ائله سن الله
انصاف آغاجی تا گؤل آچوب حاصله چاتسون
تا اینکه بشر رشد ائلیوب کامله چاتسون
بی انصافا گر میدان اولا ائو یخاجاقدور
بیچاره فقیرون بوغازون چوخ سیخاجاقدور
مظلوم اولان قلبیلری چوخ یاراجاقدور
ظالمری محو ائله خدا روی زمینن
بو ملتی آزاد ائله ناانصاف الینن
انصافی دینه ای گؤزلیم نصف یازالار
بی انصافا بئل باغلاما چوخ خلقی سویالار
نامردلر عالمده عزیز قلبی اویالار
با انصاف اولان دنیادا عقباده شریفدور
بی انصاف اولا هر کس اولا دینی ضعیفدور
انصاف آغاجون میوه لری چوخدا لذیذ دی
انصافی اولان شخصلرین قلبی تمیز دی
علت اؤدی دنیائله عقباده عزیز دی
سعی ائیله بشر اولگلا سن صاحب انصاف
هم نوعی وه عالمه گؤزل اولمویا اجحاف
انصاف و مروت ددیقون راحت جاندی
وجدانی اولان حتم و یقین درسی رواندی
انصافی اولان یوسف صدیق زماندی
انصافی رعایت سن ائله اولما خجیل سن
عزتله یاشا اولماگلان خوار و ذلیل سن
بیر عده منیم تک گؤزلیم چوخدا عنودی
بو ملت اوچون واردی قؤیون بعضی سی قوددی
الله رضاسی یوخدی فقط مقصودی سودی
بو ملتی یا رب گؤتوروب تبعیض و پارتی
رشوت آلیری آشکارا یا که ال آلتی
بیر عده ریاست ده اولان مثل بی بردی
باشدان ایاقا کبر دی گویا نه خبردی
بیر عده ولی مثل مربا و شکردی
بیر عده تملق ائدیری مردمه یا رب
پولدان خاطره خدمت ائدیر هر دینه یا رب
دین صاحبي انصافي الینن یئره قویماز
ظالم نقدر ظلم و ستم ائلسه دویماز
تقواسی اولان اؤزگلرین تاسنی سویماز
نهضت ائلدوخ تا که بوگون حق یئرین آلسون
ملت گؤرسن هانکی داشی باشونا سالسون
بعضی لری عقرب کیمی انسانی چالاندی
بو ملته زهرین تؤکوری مثل ایلاندی
سقللی مسلماندی ولی دلده یالاندی
اغفال ائلین ملتی والله بو عملدی
سقلی اوزادسن داخی ایشلرده دوزلدی
بیر سقله باور ایلمه دؤزدی او سقل
چوخ سقل اؤلوب ملت اوچون بیر یکه انگل
سقلی قویوب تا که اولوب صاحب صندل
سقلدن هدف ایشلريمیز دوز عمل اولسون
اهدافه چاتوب جامعه میز چوخ گؤزل اولسون
منظور و هدف سقله توهین دگی والله
مقصودیم اؤدی ملت اولا مطلبه آگاه
نا باب اولان سقلی نابود ائله الله
بو ملتی آزاد ائلیه تزویر و ریادن
سالما بیزی سن چوخدا اوزاق راه خدادن
شیطاندی بیزه غالب اولوب ائلیری اغفال
تزویر و ریائیله بیزی ائلیری حمال
بیر عده خبیث ایشلر اوچون الولدولا دلال
بیر عده نی قوی دنیادا هر رنگه بویانسون
هر یولدان اولا هر جوره پول تا که قازانسون
بیر عده صدیقدور سؤزونه باخموری مردم
هر دن اونا نیش وؤرولار چون قره کژدم
ناحق یئره توهین ادیرسن اؤنی گوردوم
انصاف ائله یولداش هامونی بیر هشه سورمه
دقت ائله سن یاخشنی دا پیس داخی گورمه
بیر عده جانین وردی دینه جبهه ده قربان
بیر عده دینین ساتدی ولی کم پولا ارزان
افسوس ائدیری بو توکلن قانلارا انسان
بولم نه زمان عده ای بیدار اولاجاقدور
تا هوشه گلوب دنیادا حق یول تاپاجاقدور
بیز انقلاب ادوخ آیولا بلکه بو ملت
تا اینکه گلوب ملت اوچون باوفا دولت
بیدار هله بیز اولماموشوق اولماروق هیچ وقت
تا اینکه گله صاحب دین دادی گتورسون
بو ملت اوچون هر گؤزل آزادی گتورسون
گلسه گؤزلیم ظلم و ستمنن اتر اولماز
دنیا دولاجاق عدلیله ظالم داخی قالماز
منصف اولی هامّی داخی نامرد تاپولماز
ای اعملی قورتار سؤزوی دردیمی دشمه
اشعارون اوغول چون آخری بیر بالا چشمه
