یازدوم بو شعری ماه شرافتده الهی
اول ماه دعا، ماه ضیافتده الهی
غوغا دی گینه شهرده یارب نئدی غوغا
آیا نه خبر واردی ولایتده الهی
گؤزاندی گؤیه شهرده چوخ جاریله جنجال
گویا گینه دعوادی وکالتده الهی
زینت ورلوب شهریمیزه عکس له یکسر
چوخ بد نمادي قالسا بو حالتده الهی
ده ها نفری مردله زن نامزد اولدی
تعیین اولی بیر فرد نهایتده الهی
بیر شخص گئده لازمه دور مجلسه بیزدن
وار قرخا یاخون فرد رقابتده الهی
تهمت ووراجاق بیر بیر نه بس که رقیبلر
واردی بو روش حکم سیاستده الهی
بیر بیله نماینده یازولموش نه خبر دی
بیر عده گئدیر راه سفاهتده الهی
يا رب نه اوچون بیر بیله پول خرج ائدیری او
واردی نقدر سود بو ریاستده الهی
هر صبح و مساء یالواریری بار خدایا
قویما منی گرداب خجالتده الهی
تبلیغ ائديری رأیين آلا مردمه سویلر
تنهایم اؤزوم کوی صداقتده الهی
گلشنده اگر ملتیمیز آختارا خوش گل
گلشنده منم جمله وجاهتده الهی
هر صحبت و نطقنده اوخور آیه قرآن
بیر قله اولوب کوه دیانتده الهی
گلزار ائده جک شهریمیزی مجلسه گئدسه
خوش بو گل اگر باغ سعادتده الهی
هر یاندا گؤرور تعظیم ادیب حالمی جویا
بیر دوست اؤلوری بزم رفاقتده الهی
سیز یولامویون جنگله چاقالیله تولکی
من نره شیرم اوج شجاعتده الهی
آرزوم بودی که دوز دانشوب دوز عمل ائدسون
بیر فرد امین اولسون امانتده الهی
رأی آلسا اگر اولسان نماینده عزیزیم
قویسون قدمون راه لیافتده الهی
میندیرمیه نامردلری مرکب شهره
ظلم ائتمیه میدان خباثتده الهی
گر اولسا نماینده شریف مردمی آتماز
وورماز قدمون دشت خیانتده الهی
گر اولسا نماینده خبیث ملتی سایمار
ملت قالاجاق چاه ذلالتده الهی
گر یولامویاق درد بولن صاحب ایمان
اوندا قالاروخ زیر ملامتده الهی
گر یولامویاق مجلسه بیر فرد مبرز
اوندا یاناروق نار جهالتده الهی
ای کاش تاپا یول مجلسه بر حق دین افراد
استاد سخن بحر بلاغتده الهی
اؤز نفعی اوچون رأی آلوب مجلسه گئدسه
شرمنده اولار روز قیامتده الهی
اللهدان اؤتور اولسا اگر منده دعاگو
بیر فرد تاپولدی بو رشادتده الهی
ملتدن اؤتور مجلسه گدسه اونا سؤز یوخ
یاتماز داخی او خواب بطالتده الهی
دلسوز اولا او ملت اوچون کوی وفاده
تا یانمویا او شمع حقارتده الهی
اندیرمیه صندلدن اوغول فرد تعالی
تا قالمویا او موج اهانتده الهی
یا رب گؤرسن رأینی ملت کیمه وئرسون
پرواز ایلسون شهر عدالتده الهى
بولاردی حالا روشن اولان آختاریرام من
هوشیله شعور ساده جماعتده الهی
دوران وکالتده اگر ائلیه خدمت
ساخلا سن اونی تحت حمایتده الهی
دؤرد ئیل قوتاروب، باشه یتوب ائدمیه خدمت
غرق ائت اونی دریای ندامتده الهی
یاران! اوقدر ائدی نزول پست وکالت
منده گزیرم عشق وکالتده الهی
یا رب منه قسمت نیه اولمور بو وکالت
منده اوتورام تخت صدارتده الهی
تا اینکه آلام عمر بؤئی حق وکالت
منده یاشویام خانه راحتده الهی
گر قسمت اولا ایلمیم حقی احیا
اوندا یانارام نار جهالتده الهی
لازمدی نماینده گرگ قوخمویان اولسون
تا سیر ائلسون جو شهامتده االهی
هر کس گئدیری گئدسون اوغول اولما ملول سن
لازمدی گئدن اولسون اطاعتده الهی
کیم آغلیاجاق کیم گولجک روز شنبه
بیر عده گئدر حال کسالتده الهی
ای اعلمی حق سؤزلریوی یازگلا قوخما
وئرسون سنه قدرت بو کتابتده الهی
