ای چمن گؤلرینی سولدوران هر آن باهالوق
اوت وروبسان یانیری صحن گلستان باهالوق
ای اسن باد خزان تک گل و گلزاره بوگون
گورمویوب گلشن و گؤل بیر بئله دوران باهالوق
باهالوقدان سارالیب گؤلریمز گلشن آرا
بلبل شیدا باخور ائیلیری افغان باهالوق
غم فزا ایلموسن باغیله بستان هاواسون
نفرین ائیلیر سنه چوخ باغیله باغبان باهالوق
چوخلاری میوه آلامیر صغیر اولادنا او
ائدموسن دنیادا چوخ گوزلری گریان باهالوق
سرعتون چوخدی سنون صبر ائله سن بیرجه دایان
رحم ائله بیزلره سن بیز سنه قربان باهالوق
ازدواج ائیلمری چوخلی جوان قالدی سوبای
گله مند سنن اولوب چوخدا قیز اوغلان باهالوق
بولمورم هانسی خبیث دعوت ائدیب سن گله سن
گلمیسن بیزلر اوچون اولموسان مهمان باهالوق
زینت قبر و کفن غسل و حنوط قبر اؤزوده
ملا و نوحه خوان و مسجد و احسان باهالوق
طوی قوناقلوقدا باها جشن و سرور چوخدا گران
تار قوال زرنا چالان چوخدا غزل خوان باهالوق
سود یوغودا باهادی بال کره آلان آدام
پنیری بئینمین ایندی آلر جورتان باهالوق
ات باها تویوق باها یومورتویا مشتری چوخ
گئجه نی گوندوز ائدر تا دوغا حیوان باهالوق
گر اولا ظلم و فساد اوردا اولار چوخ باهالوق
نیله سون اوردا اولان متقی انسان باهالوق
زلزله، جنگ و سویوق ایرانی ویران ائلدی
لطف ائله بیزلره سن ائلمه ویران باهالوق
آجر و ماسه باها، کارگر و بنا باها
ییر باها خانه باها آهن و سیمان باهالوق
دفتریله کتابا، کل نوشت افزارا باخ
مرکز علم و ادب درس و دبستان باهالوق
واردی بیر عده آدام خرج ده اسراف ائلیری
علتی واردی ائدیر دهرده طغیان باهالوق
سن سفر ائیله گلن خارجه کشورلرینه
بلکه بیرگون گؤره بو ملت ایران، باهالوق
وار گناه بیزده چوخ، یوخدی بیزیم انصافموز
عدم انصاف اولور ائیلری طوفان باهالوق
چوخ مریض واردی چوخی قلبله اعصاب مرضی
یوخ دوالرده اثر دکتر و درمان باهالوق
بعضی مامورلار ائدیر خلقی اسیر، پولدان اؤتور
آلیری رشوه، سنی ائیلری عنوان باهالوق
باهالوق باعث اولور چوخلاری ائیلیله خلاف
ائدیری مجرمی چوخ داخل زندان باهالوق
محصولون آفتی چوخ لیک دوا، سم باها
حاصله چون باخوری آغلوری دهقان باهالوق
مردمه چوخدی فشار چوخ ائلیری آهله زار
ماشین لار تازه مدل یوخ داحی پیکان باهالوق
سوار ماشین اؤلوب گزماقا هر یانه گئدیر
بی جا پول خرج ائدیری چوخ تاری جان باهالوق
چوخ اوجا قامتی سن ایلموسن مثل کمان
ایلسون قدوی خم خالق سبحان باهالوق
بعضی لر اسراف ائدیر یوخدی قناعتدن اثر
اؤزی بد خشدی دییر چیخما جیزقدان باهالوق
نه قدر ظلم ائدیسن ایله گلن ملته سن
بلکه گلسون جهانا حجت یزدان باهالوق
کت و شلواردا باها کونیک و باشماقدا باها
روپوش و چادر باها پوشاک الوان باهالوق
واردی بیر عده ده پول خرج ائدیری لذتیلن
سنه هر ییرده دییر تهمت و بهتان باهالوق
حکم قرآنه عمل ایلمساق حتم و یقین
غضب ائیلر بیزه چوخ صاحب قرآن باهالوق
زندگانلوق نظامون بیر بیرینه چالخالادون
اودی علت آزالوب دینله ایمان باهالوق
اوخودی درسلرینی چوخلی جوان ائدی تمام
قالدولار ائوده بئکار با دل سوزان باهالوق
اؤلی افسرده اگر اولماسا ایش هر جوانا
والدینی اولاجاق چوخ اؤرگی قان باهالوق
باهالوقدان هامولار دادقلیری دلده ولی
تشریفات اولان زمان یوخ سنه میزان باهالوق
تشریفاتدی گتوروب بیزلر اوچون چوخ باهالوق
تشریفات اولماسا گر چوخ گؤری نقصان باهالوق
باهالوقدان آپاروب عده ای چوخ سود کلان
خاطر خوش واردی سؤیلری جان جان باهالوق
استیاق رفع اولا بیزدن دها الله بلاسی
بیز گرگ اوندا اولاق دوغری مسلمان باهالوق
هر ایشین مشکلی وار زحمتی وار حاصل اولا
مقصده تیز چاتوری راحت و آسان باهالوق
یوخ نیاز تا که گئدیب بیرجه مجور آلا او
بیر مقامیله گئدیب باغلیا پیمان باهالوق
بیر نهادی باهالوق آزاد و خودخواه اؤزودی
هر زمان سوسه ائدر قلبیمی چوخ قان باهالوق
بیر یامان ددی گلوب مردمی بیمار ائلیوب
یوخ علاج من بولورم دردیوه درمان باهالوق
وارلیا یوخ اثرون زجر چکن یوخسول اولی
سنه لعنت ائدیری قوم ضعیفان باهالوق
سن خیال ایلمه که بیرده اوجوزلوق گله جاق
غیر ممکندی گله تا اولا ارزان باهالوق
دولتونده گؤجی چاتمور قاباقون آلسون اونون
بولمورم نیرونی او اخذ ائدیر هاردان باهالوق
محتکر لردی اونی صاحب قدرت ائلیری
سودجو شخص دن او چون آلی فرمان باهالوق
نیله سون بس بو زمان یوخسول بیچاره فقیر
چوخلاری آرزو ائدیر اولماقی هر آن باهالوق
اوغلانا اجرا گئدیر مهر و صداق که یقین
اوغلانا مسکن اولار حبسیله زندان باهالوق
باهالوق باعث اولوب مهر و صداق دا چوخالوب
کیشیه تحمیل ائدیر چوخ زادی نسوان باهالوق
باهالوق باعث اولوب ائوده اولور جنگ وجدال
طلاقا چوخ یتیشر محکمه دیوان باهالوق
یوخسولون قیزلارنا مشتر چوخ چون آز اولار
گر گؤزیلکده اولا بیر بالا جیران باهالوق
قیشدا گر شاخدا اولی قار سویوخ هر یانی توتا
لیک نوروز وئریری عمرونه پایان باهالوق
ائل بوئی چولقالویوب ابر گرانی وطنی
یاغوری مثل یاغیش همچو بهاران باهالوق
یوخسولی یوخسول ادیب چوخلارنی صاحب مال
شیرلری گربه ائدیب تولکونی اصلان باهالوق
دوزخی ائدون اوجوز چوخدی خریدار اونا
چون بیزی دعوت ائدیر دوزخه شیطان باهالوق
لیک جنت باهادی مشتری چوخ آزدی اونا
جنتی بیرجه آلار صاحب ایمان باهالوق
قوتلا دامیدان اولار، حمله ائده قوچ قویونا
یاخشی فرصتدی توتا دشتینی دومان باهالوق
گئجه گوندوز قاچری پول دالسونجا بوبشر
جنته گئتماقا یوخ مردمه امکان باهالوق
چشم هم چشمی بیزی دنیادا دامنگیر ائدیب
اودی که اولدی سنه بیر یکه میدان باهالوق
باهالوق باعث اولوب نرخ دلار اوج ائلسون
بیر دلار دودمینی آشدی گینه الان باهالوق
باهالوق باعث اولوب رشد ائلسون شغل قاچاق
خارجی جنس گلوب تا دولا ایران باهالوق
باهالوقدان نه قدر سن دیسن آز دئموسن
بو قدر اعلمی بول دنیادا هریان باهالوق
