بعضی آروادلار اولار چوخ کیشیه درد و بلا
اولدی بیچاره او کس که بئله بیر آرواد آلا
بو زماندا اؤزونی درد و غم و فکره سالا
طوق لعنت گئچیده خدگینه چوخ سیخلا
کفلی تک گه ییروب گه دایانوب گه یخلا
گئجه گوندوز دیجک دائماً آرواد کسیلم
پانکی شلواریله یوخ ایپک دونوم من خجیلم
گر پوزوم دوزلمسه دنیادا بول من ذلیلم
بولمرم واریله یوخ پوزوم منیم گرک اولا
نانیکور باشماقلان چادرم منیم ایپک اولا
دییجک صحبت ائدیردی هامویا خانم رباب
رستوراندا ییروق هر گئجه بیز چلوکباب
آی کیشی لطف ائله سن ایله گلن سنده ثواب
شام نهار ایستمه سن ائشگیده بیز ییاخ شامی
تازه مد اولماقی من صحبت ائدوم بوله هامی
گه دییر مددان دوشوب دستبندیلن سینه ریزیم
هامونون وار اؤزوگی، النگوسی یوخدی منیم
آل سالیم قولاریما، بارماقیما منده گزیم
گؤنده من چیخم گئدوم آلماقا بیر زاد ائشیه
خیاباندا دولانوم پوز وئریم آرواد کیشیه
هر نه آلسا گتیسه قیمتی ارزان اولاجاق
یملی اولسا اگر دردلره درمان اولاجاق
گیرملی اولسا گیرن بیر بالا جیران اولاجاق
چون خریدار اؤزودی آلدوقی عالی اولاجاق
نقص و ایرادی اولا عیبدن خالی اولاجاق
وای او گونن که آلا شوهر ائوه بیر زاد اونا
نه قدر یاخشی اولا سویلوجک ایراد اونا
مین جوره عیب دیوب قیمتی چوخ آرواد اونا
او قدر ایلیه جک شوهری ناچار ائلسون
پول وئریب آروادینا عازم بازار ائلسون
گر گئده مجلسه یا تویلارا وای وای ارینه
اخم و تخمیله ورر شام توکور چای ارینه
مین قیافیله چکر بوشقابونا پای ارینه
سوئلیری اهل تویون زینت و زیورلرینی
خانم اولاردی دییر تعریف ائدیر ارلرینی
یوخ عقیده اوخویا قرآنی معنا ائلیه
حجابی حفظ ائلیه عهدینه ایفا ائلیه
همسرین شاد ائلیوب صورتی زیبا ائلیه
نه که زینت ائلیوب اؤزگه گؤره چهره سینی
دانشاندا ازیله تا بوللر خوش سسینی
گر مریض اولسا خانم عالمی ظلمت توتاجاق
ناله سی عرشه گئدوب قلبینی وحشت توتاجاق
یاخشی اولماقدان اوتور هر جوره شربت توتاجاق
عازم دکتر اولوب اوندا بیر آز پول آلیری
معاینه دکتر ائدیب قرصله آمپول یازیری
پهن ائدیب رختخوابی داخل اولوبدی یاتاجاق
بیر اوشاق دیلسه اگر بیر کوواز ایت تک قاپاجاق
سانمیوب خردا بیوک هامونی فحشه قاتاجاق
دینمویون دانشمیون حوصله سی یوخ خانمون
انتظار و گله سی وار هامودان چوخ خانمون
دکتره گئدمسه او ناله و فریاد ائلیر
دکتره گئدسه اگر دکتری ارشاد ائلیر
دکترون تشخیصینه دکتره ایراد ائلیر
آلسا گر دارولارن قرصلارن آتمیاجاق
آمپولی وورمیاجاق شربتنی دادمیاجاق
گر مهیا ائلیه بیر غذا شامیله نهار
قویاجاق سفریه لیکن ائده جک آهلا زار
گر دئسن یاخشی دگول اوندا تپر بول که هاوار
شور اولا شیرین اولا تلخ اولا یا توش ییسن
آفرین پختوا اولسون سنه آرواد دییسن
میلی گر اولماسا طفلین یمسه طفل غذا
بویانموب ماتمه اوندا اولوری صاحب عزا
متوسل هر ایشه طفله وئریر زجر و جزا
یئتیشر قولاقه چوخ دم به دم آخر بو صدا
سن غذا میل ائله سن میلون اگر اولماسادا
بولمورم هاردان آلوب دکتراسون طبّ ده او
کو داد در استادی جمع السود او
آییرور سود و زبان شربتلن حبّ ده او
گؤز دیگوب فایداسی وار چوخ اؤزلیک دودی سنه
آلا آت کپسولی وار قوتیلن سودی سنه
گر قوناق گئدسه خانم دردی فراموش اولاجاق
بزنیب تازه گیوب جالب و شیک پوش اولاجاق
قاپولاردا شاد اولوب سالم و دلخوش اولاجاق
گئجه بی وقت گلوب باشلیاجاق من اؤلورم
مرضیم شدت ائدیب عزرائیل من گؤرورم
شام که یوخ تا گئتورب میل ائلیب دلشاد اولا
خستلیگدن قوتولوب راحتیلن آزاد اولا
شیطان لعن دیوب شوهر اونا داماد اولا
ایستیه خوش یاشیا اؤزگه سؤزون آشمیا او
صبرینی چوخ ائلیه قینممیش داشمیا او
کیشیه لازمه دور عورته امداد ائلسون
ائوه شئی آلماقیلان آروادی دلشاد ائلسون
گر خانم اسراف ائده حقی دی ایراد ائلسون
اسرافون حرمتینی قلبیوه یاز درج ائله سن
حکم اسلام باخوب وار قدری خرج ائله سن
اریوی پرت ائلمه ناجور و ناخوش سؤزونن
اعصابون خرد ائلمه مصرفی یوخ بوش سؤزونن
خسته و یورقون اولوب گویلونی آل خوش سؤزونن
باشینا چپّا گلان آلدیقنی پیسلمه سن
نابلد ایت کیمی فوراً اریوی دیشلمه سن
هر یانا گئدسن اگر اذن و اجازه آلاسان
ورمسه اذن اگر ائوده گرگ سن قالاسان
باخاسان سؤزلرینه نه که ائلان تک چالاسان
سؤزونه باخسان اگر صاحب شوکت اولسان
سربلند دو جهان سؤگلی عورت اولسان
دنیانون گر خبرین ایسته سن آروادا اولار
توی قوناقلقدا اولان سؤزلر هامی یادا اولار
قیشدا سن نفت دئیسن اجراسی مردادا اولار
فکر و ذکری اولوری اؤزگه سؤزی اؤزگه ایشی
قالمیوب قالمویاجاق یادا ولی ائوده کیشی
بیر سؤزی اون دفعه قادیردی دییر چکمیری ال
بیر جوره سؤز دییری سؤزلرینه یوخدی محل
بس که دستور وئريرى دستورونا اولمور عمل
سؤزلری سؤز دیری اجرا اولا بلکه چاخان
علتی واردی اونون سؤزلرینه یوخدی باخان
اؤزگنین ایشلرینه بس که دخالت ائلیری
سرسری قیم اولوب همده وکالت ائلیری
بو روشله اؤزونی چوخلی خجالت ائلیری
بیر بئله ایش گؤرنون فکرده آلوده اولار
گر گئده اؤز ایشنه راحت و آسوده اولار
آروادن سلقه و صبری ائو ایشینده گرگ اولسون
اروادن تنبلینه وئرمگلن سن چورک اولسون
بو جوره آروادی اولان لازمه دی گئن اؤرگ اولسون
سلقه سهمان ییرینه باخسون اونون قاش گؤزینه
قولاق آسون سؤزینه بلی دئسین هر سؤزینه
شیطانون ایشلرینه چوخ خانم امداد ائلیر
جنته گئدسه اگر جنته ایراد ائلیر
فق ورار جنته او مسئله ایجاد ائلیر
علتی واردی دییر جنته زن کم گئده جاق
شیطان یولداش اولوب دوزخه با هم گئده جاق
کیشی دی آرواد اولوب آرواد اولوب شوهر اونا
کیشی دی نوکر اولوب آرواد اولوب سرور اونا
بئلینه سوار اولوب شوهر اولوب استر اونا
باشنا نوخدا وروب هر یانا او چکیر گئدیر
هر غذا وئرسه اگر ناچار اولوب یئیر گئدیر
لیک وار یاخشی لاری انصافن انسان دی اولار
با حجاب مومنه، صاحب ایمان دی اولار
معتقد آللها چوخ تابع قرآندی اولار
دنیانی گؤزدن آتوب آخرته باغلودولار
چون شهید دینه وئروب قلبلری داغلودولار
گر اری یوخسول اولا صبر ائلیوب اوندا دؤزر
اولماسا ایپک دونی ساده گییوب ساده گزر
بو روشله ارینی شاد ائلیوب نفسین اذر
گئجه گؤندوز شاد اولوب خرم اولوب خوش یاشیار
دائما خوش او گولوب خوش اشیدوب ه خوش دانشار
صالح آرواد کیشیه مایه عزت اولوری
گر کیشی بدخو اولا باعث الفت اولوری
صبر ائدیب سؤزلرینه آخری خوشبخت اولوری
پیس جواب ورمیه بلکه گوله قاه قاه ائلیه
رفتارون خوش ائلیوب شوهری اصلاح ائلیه
نانجیب اولما خانم شوهری غمگین ائلمه
تورشادوب قاش قاباقی صورتی چرکین ائلمه
بو طریقله گناه وزننی سنگین ائلمه
بو روشله گؤزلیم عمری تباه ائلمه سن
حوصلن ائیله گئنیش چوخدا ناه ائلمه سن
خانمون قدرینی بول چوخدا اذیب ائلمه
حالونی آل نظره چوخدا مذمت ائلمه
توی قوناقلقدا گئدیب سنده شکایت ائلمه
خانمون صالحنون ارزشی وار قیمتی وار
کیشیه عمر بویی قدر بولوب خدمتی وار
نانجیب اولسا خانم واردی مصیبت سنه چوخ
سؤزلری یاره ائدر قلبوی چون زهرلی اوخ
واردی زوریه فشار بیرجه فقط زندگی یوخ
غرق دریای غم اول واردی عذاب چوخدا عظیم
یاندرار جسمیوی چون آتش سوزان جحیم
گئجه گؤندوز بو شعری یازماقا من فکر ائلیرم
نانجیب خانوملارون حالنی من ذکر ائلیرم
همسریم بوجور دگؤر الله من شکر ائلیرم
قاری قرآن اولوب گونده قراعتده دی بو
دائماً من گؤرورم حال عبادتده دی بو
غیر صالح گر اولا آروادی هر بیر کیشینون
روزگاری قره دی پولسوز اولان بیر کیشینون
خدیگی آرواد الینده قالاجاق شیر کیشینون
اعلمی بس دی داخی صحبت آرواد دئمه سن
سؤزی قورتار گینه تا باشماق آرواد یئمه سن
