بلبلون وار هوسی تا گئده گلزاره گؤزل
گئدیرم عشق یولون تا یتیشم یاره گؤزل
یارا چاتماق مارالیم ساده و آسان دییری
روبرو سن اولسان مشکل و دشواره گؤزل
ایسته سن گؤل درسن گؤللر ایچینن گؤزلین
اعتنا ایلمه سن نیش ووران خاره گؤزل
عاشقه نوش اولوری تا ره عشقینده اؤله
اوف دیمز عشق یولوندا چکیله داره گؤزل
کسلر عشق یولوندا باشینی طشت ده اگر
الله الله دیجک باش بویانا ثاره گؤزل
دوست اگر دوست اولا، بلی دییر دوستونا او
دشمنه بلی دیمز گر آتالار ناره گؤزل
سالدیلار یوسفی چاهه ره عشقونده ره اونی
ساتیلار برده لوقا بیر نئچه دیناره گؤزل
لیک الله یتوروب یوسفی بیر مرتبیه
تا زلیخا یتشوب یوسف دلداره گؤزل
حسن اخلاقیده گئت پیرو ختم رسل اول
صاحب خلق عظیم احمد مختاره گؤزل
ایلدی جور و جفا چوخ اونا کفار زمان
اولمادی راضی ولی ظلم اولا کفاره گؤزل
وردی خندقده علی ضربتی الله گؤره
امتثال ایلگلن حیدر کراره گؤزل
فاطمه اولدی شهید اولدی علی خانه نشین
دشمنین ظلمی ائدیب قلبنی صد پاره گؤزل
ائدی فرمایش علی فیضه یتیردی منی چوج
ظلم الینن یتیشن باشمه او یاره گؤزل
حسنه امر ائلیوب یاره گئدوب چاتسام اگر
بیر قلج ورگلاسن دشمن غداره گؤزل
باخگلان عاشقه سن یاره جانین تسلیم ائدیب
مدفنی معشوق اولوب گور نجه زواره گؤزل
یاره چاتماقلوقا گئت راه عبادت یولونا
تبعیت ایله سن عابد غمخواره گؤزل
اللها تقدیم ائدیب جانله اولادین حسین
گور نئجه عشق یولوندا دوزوب آزاره گؤزل
ایسته سن پیروز اولوب جنگده فاتح اولاسان
آتکا ایله گلن خالق و ایثاره گؤزل
ایثارون درسینی عباسیدن آل وئردی خدا
گؤر نئجه عالی مقام قولسوز علمداره گؤزل
عاشق یار اولاگر جنگده رزمنده گؤرل
یتیشر معشوقه او گر دیه خمپاره گؤزل
اوندا معشوق دولانوب آختارری عاشقنی
گر دیه عاشقه تیر قان ائده فواره گؤزل
عشق معشوقدی چکیر داغ داشا عاشقلرینی
سالیری چولره او ائیلری آواره گؤزل
عاشق یار اولان لازمه دی زجر چکه
بو روش عشقده وار یوخدی داخی چاره گؤزل
گئجه گوندوز یازییری اعلمی شعر یاره، عزیز
نطقینی ایله روان سویلوری داداره گؤزل
