مژده ای بلبل سنه قیش قورتاروب گلدی بهار
یاغدی رحمت یاغیشی چوللرده اولدی لاله زار
چشمه لر جاری اولوب تشکیل تاپوب چون نهریلر
وارد دره اولوب گلدی خروشه آبشار
ذوب اولوب داغلار قاری گؤللر آچوب رنگا برنگ
مرغ حق ایلیر نوا بلبل اوخور با آه و زار
معتدل اولدي هوا وردی صفا عالملره
رشد ائدیب یئردن علف گلدی وجوده سبزه زار
قدرت اللهله یئردن گوردی لاله لر
اولاری سیراب ائدیب آب زلال چشمه سار
گلدی پروانه وورا بوسه گؤله گلزارده
اخذ ائده شیرین عسل زنبور خوش نفش و نگار
اشک ریز ابر بهاران خنده ایلیر ایلدروم
آهولار سیر چیخوب اولدی مزین کوهسار
داغ دره گؤلدی چیچکدی قوچ قویون چیخدی چوله
چای ایچر چشمه کناریندا چالار نی چوبدار
نورینی پرتاب ائدیب خورشید به گلزار و چمن
گلدی مرغان خوش الحان تابدی زینت مرغزار
غنچه لر چوخ دیگلوب آماده دی گؤل آچماقا
گؤلری خوش رنگ اولار آلما هلو هیوا و نار
گؤلری تبدیل اولار وقتینده هر نوع میویه
چوخ لطیف خوش رنگ و بو چوخ شیرین هم آبدار
کهلیگین قاقیلدسی وجده گتوردی شاعری
نو بهار وصفون یازار شاعر سنین لیل و نهار
عشقنی بلیل گؤله ابراز ائدیب چه چه وروب
گؤلده عطرین بلبله تقدیم ائدر بی اختیار
خوش اولار سیر و سیاحت انسانا فصل بهار
گر اولا یاری اونون شیرین زبان گلگلون عذار
جانلارا وردی صفا باد نسیتم وقت سحر
ارغوان گؤل آچوب عالم اولوبدی مشکبار
عشق ساز اولدی طبیعت عشقلر ابراز اولوب
عالمه احراز اولوب قدرت نمای کردگار
اون اوج ماه رجب روشن ائدیب عالملری
چون علی گلدی جهانه او شه والاتبار
گلدی دنیایه بوگون بیت خداده شیر حق
نور حق رخشان اولوب الله ائوینن آشکار
زادگاه اولدی جهاندا کعبه حق حیدره
قتلگاهی مسجد اولدی نائل فیض کبار
یازمیوب تاریخ جهاندا بو فضیلت بیر کسه
اخذ ائده بو عزتی غیر از علی بیر شیرخوار
افتخار وئردی خدا شیر خدایه کعبه ده
کعبه دن آلدی شرافت اولدی صاحب افتخار
ای علی شیر خدا سن صاحب بذل و کرم
لافتی الا علی لا سیف الا ذوالفقار
ای اولان دینه فدا اسلامه یاور یا علی
رزم میداندا اولان شیر خدا دلدل سوار
اسوه ایمان علی مظلوملارا حامی اولان
ظالمی سرکوب ائدن ای رهبر صاحب وقار
حفظ اولا جان نبی یاتدون یئرنده سن علی
بهر حفظ دین یزدان ایلدون سن جان نثار
بیر قلیچ ووردون علی خندق گؤنی بهر خدا
دینی زنده ایلدون اسلامه وئردون اعتبار
قدرت شمشیریلن ائدون دو نیم سن یل لری
دوستان خرم اولوب دشمنلرین چوخ شرمسار
ای اولان عالملرین علمینه دارا یا علی
سنده تکمیل ایلیوب اوصافونی پروردگار
عاشق الله سن عارفلر استاد اولان
عالمی حیران قویوب صبرین سنین ای گلعذار
مجری قرآن اولان پیش خدا عبد ذلیل
حفظ اولا دین خدا سن خانه ده توتون قرار
ای مقاوم شیر دل میدان رزمون ضیغمی
دشمنان تاب ایلمز میدانان ایللر فرار
حافظ جان نبی اولدون احده سن علی
شمشیر الده سن دولاندون باشینه پروانه وار
دشمنان چوخلی یارا ورودی سنه میدانیده
استقامت ایلدین با اینکه اولدون زخمدار
شمشیرین سندی سنین قالدون معطل جنگده
یولادی شمشیر سنه الله به نام ذوالفقار
خیبری فتح ایلدون قتله یتردون مرحبی
شادکام ائدون نبینی مرحبا ای نامدار
قلب خیبرده گئدوب دین پرچمون نصب ایلدون
ضرب شستونن علی دشمن اولوبدی تار و مار
بت لاری کعبه دامونان سرنگون سن ایلدون
بت شکن قالدی آدون دنیاده جاوید یادگار
دید چشم کافران سن بتلری نابود ائدیب
مکه فتحینده علی سن ایلدون بیر شاهکار
ای علی سن سن بیزه دنیا ده رهبر پیشوا
مهدیوین گلماقینا وار شیعه ده چوخ انتظار
ای علی عدلون سنین دنیا ده غوغا ایلیوب
گلسه اجراء ایلیر عدلون سنین او شهسوار
شیعه گؤزلر یولونی هر روز و شب مولاسنین
شیعنین ایلوبدی قلبین فرقتون چوخ داغدار
سرفراز شیعه اولار گلسن اگر صاحب زمان
جعفری مذهبلر وار دنیادا چوخلی فشار
ای علی سن سن جهاندا مرد و مردانه اولان
لیک ناکسلر سنی دنیاده ایلوب دل فگار
ای یتیم لر صاحبی، بی کسلر امید اولان
دردمندان دردینه ایله دوا رفعت مدار
بیر عمل اولماز قبول بی عشق سن پیش خدا
سن ولی الله سن هم قاسم نوریله نار
بیر شهید وئردون جهاندا زنده ساخلار اسلامی
نهصتینن تا قیامت دین یزدان پایدار
سن خدادن راضی سان الله ده سنن راضی دور
سن صدیق و خیرخواه ای مهربان آموزگار
اسلاما رهبر اولان عالملره سن افتخار
وار سنه ارض و سماده عاشقان بی شمار
حقیوی ضایع ائدیب قوم منافق یا علی
اسلاما ضربه ووروب او دشمن بی ننگ عار
دشمنانون ای علی گرچه سنین غدار دور
لیک سن بیر قهرمان دشمن شناس دشمن شکار
حق دینی اجرا ائدن سن سن جهاندا یا علی
گؤرمیوب گؤرمز سنین تک کامل انسان روزگار
دشمنان ظلم ایلدی دین خدایه یا علی
اسلامی تضعیف ائدیب اهل ریا و نابکار
دوغمویوب دوغماز جهانین مادری سن تک امیر
گر اولا ییر گوی جهاندا همچو مادر باردار
یوخ علی ده واهمه عالم اگر دشمن اولا
قلبینی تنگه گتوردی مسلمین کم عیار
سن جوانمرد جهان مشکلره مشکل گشا
عالمین مشکلرین حل ایلین ای تاجدار
پرورش تابدی علی در دامن ختم رسل
اولدی داماد هم وصی پیغمبره او شهریار
دینه خدمت ایلدون سن یا علی با جان دل
عالم هستی سنین تک گؤرمیوب خدمتگذار
دشمنان تصمیم توتوب دین خدا سرکوب اولا
لیک سن دشمنلری سرکوب ائدین با اقتدار
چوخ تلاش ائدی عدو حق نورینی خاموش ائده
حق نوری افشان اولوب سن حقه اولدون پاسدار
جنگ صفین ده سنی یالقوز قویوب نامردلر
قرآن ناطق سؤزون هیچ ایلیوب تولاندولار
لشکرین مجبور ائدیب بین دو لشکر حکم اولا
اشعرینی تولادی عمرعاص لعین او حیله کار
عزل ائدیب عمرعاص سنی اولدی امیر چون معاویه
آناماز لشکر سنی مایوس ائدیب چوخ غمگسار
عدل و داده دؤزمیوب دنیاپرستان یا علی
عثمانی عنوان ائدیب باشوبلا سنن کارزار
وردولار تهمت سنه تحمیل اولوب جنگ جمل
جنگ اوتون روشن ائدن طلحه زبیر زشتکار
دشمنی سرکوب و فانی دین حق پیروز اولوب
دین حق دنیا بویی دنیاده اولدی ماندگار
ایلیوب جنگ و جدل سنن شیوخ نهروان
اولدولار خوار و زبون سوی جهنم رهسپار
اوخ بدنن چکدیلر حال نماز اوسته علی
چون عذابی خنثی ادمیشدی بدنن عشق یار
ابن ملجم له قالوب دقوز نفر او قومودان
ابن ملجم قتلیوه اقدام ائدیب او ظلمکار
زهریلی شمشیر دئگوب فرق مبارکدن علی
دیده شیعه جهاندا تا قیامت اشکبار
پیرو شیر خدا ای عاشق مولا علی
اخلاصی اؤرگن علی دن اولگلان سن هوشیار
گر اولا اخلاص عمل خشنود اولار ختم رسل
شادمان شیر خدا راضی اولار پرودگار
هر قدر یازسان اگر فضل علی قورتولماز اعلمی
دامن شیر خدادن سن یاپوش اول رستگار
