اشعار حاج حسین اعلمی (۷۳) تقدیم فرزند

 وئردیم فدا دینه اوغول تقدیم جانان ایلدیم

                                                       اؤز وئردیقی امانتی تسلیم سبحان ایلدیم

پابند دین ائدسون گرگ تعقیب ره استادینی

وئرسون حسین تک اوغلونی اؤز جاننی هر زادینی

اکبر تکین گل پیکری اصغر کیمین نوزادینی

                                                  وئردیم شهید قرآنه من تحکیم قرآن ایلدیم

وئردیم اجازه تا گئده صدامیلن جنگ ایلسون

تا عرصه نی میدان ده دشمنلر تنگ ایلسون

دورسون مقابل کفرلن اهدافونی لنگ ایلسون

                                                   بو نیّته اعزام ائدیب تصمیم میدان ایلدیم

با قلب پاک عازم اولوب حقّدن دفاع ادماقلیقا

تا هستی و جانین بوگون دینه فدا ادماقلیقا

چوخ سعی و کوشش ایلیوب مقصودینه چادماقلیقا

                                               مقصودني عرض ایلیوب تفهیم دونان ایلدیم

رهبرلری مولا علی دؤزسون گرگ هر مشکله

اوغلی اولار زخمی اونون یا پیکری گلمز اله

باغلار توپا اطفالینی صدامیان چون حرمله

                                             بیر طفلنن عالمده من تعظیم یزدان ایلدیم

قوی ایلسون ضد انقلاب تبلیغ منفی ملته

من باخمارم تبلیغنه تن وئرمرم من ذلته

من گویمارام ضربه وؤرا ضد انقلاب بو دولته

                                                 بیدار ملت ایلیوب ترمیم نقصان ایلدیم

آل سن بوگون زیر پربش اوغلوی مثل تویوخ

قویما اونا تاثیر ائده بو دهر ده ایسی سویوخ

قوی نوجوان اوغلوم گئده قبره منیم قلبی اویوخ

                                               بولننره روشن بوگون تقسیم ایمان ایلدیم

ملت ائدیب در راه دین نهضت بوگون ایرانیده

وار قدرت دست خدا اسلامیده قرآنیده

قالموب داخی قدرت بوگون خانیله لیگ سلطانیده

                                                    بو کشور اسلامیده تحریم شاهان ایلدیم

دنیانی وحشده قویوب بو قدرت رزمیم منیم

ظالملری ترسان ائدیب بو مکتب و عزمیم منیم

لطف خدایه باعث او رفتاریله طرزیم منیم

                                                   من مکتبه ائدیم عمل ترحیم رحمان ایلدیم

وار عده ای قانموب هله ایمان نه دور قرآن نه دور

درک ایلمور دنیاده او حیوان نه دور انسان نه دور

آنجاق بولر دنیانی او بولمر هله رضوان نه دور

                                                       گئدی شهید رضوانه چون تکریم رضوان ایلدیم

من با کمال شوقیلن لبیک خدایه من دئدیم

ون رهبریم روح خدا، راه خدایه من گئدیم

 بو خائنین کشوری لازمدی افشا من ائدیم

                                                    هر مطلبی قیلدیم بیان تعلیم نادان ایلدیم

دنیانی حیرتده قویوب بو ملت اسلامیان

بو مکتبون چون ارزشین بولمز جهاندا کافران

بو مکتبون چون قیمتین تعیین ائدیب پیغمبران

                                              تا جان وئریب دین ساخلیوب تقدیم ادیان ایلدیم

دوشدوم جهاندا مشکله اولدوم صبور راه دین

اولسون شکیبا دهر ده بهر خدا چون مسلمین

امداد ائده الله اؤزی پیروز اولار اهل یقین

                                                        بو مطلبه عالمده من تحکیم وجدان ایلدیم

با لحن ساده عرض ائدیب نقش دینی ائدیم بیان

سیز مطلبی درک ایلیون بیدار اولوب ملت اویان

ای اعلمی سن سن بوگون عالمده حق سؤزلر یازان

                                                یازدیم بوگون اشعاریمی ترسیم دیوان ایلدیم