ولادت و شجاعت حضرت علی اکبر علیه السلام
***
بیت رسولی حق ایلیوب چون مکان عشق
اولموش قیام حشره کیمی آشیان عشق
غار حراده نازل ائدوب ئوز کلامینی
جبریلیلن یتوردی رسوله سلامینی
بیر لحظه گوسترنده جلال و مقامینی
نوریله اولدی غار حرا کهکشان عشق
لازیمــــدی کهکشـــانه گوربدور گونیله آی
شیر خدانی خلق ایلیـــــوب گون ،بتــولی آی
دورینده آی گونون نئچه اولدوز وئروبدی پای
اولدی بو جمعه ختم نبی آسمان عشق
اولدوزلارین بیرین یارادوب حی ذوالمنن
گلدی وجوده گل آدینی قویدولار حسن
اما بیر اولدوزی گورر عمرینده چوخ محن
گلدی حسینده کامل اولوب خاندان عشق
ایللر گئچوبدی آی دولانوب گلدی ماه عشق
آچدی بو آیدا نوریله حق ، شاهراه عشق
شعبان آیندا لطف ایلدی پادشاه عشق
وئردی حسینه بیر بالا اولدی جوان عشق
ختم رسوله وئردی خبر جمله قدسیان
زهرایه سن اوزون ایله بو مژده نی بیان
دنیایه کوچ ائدور هامی غلمان و حوریان
لیلا ایوینده اکبر آچوب دیدگان عشق
شهلادی گوزلری یوزی آی قاشلاری کمان
الله ، گورن دیور نه گوزلدی بو نوجوان
آیا بشردی خلق ایلیوب حی لامکان
یا بیر ملکدی نازل ائدوب حکمران عشق
حُسن و کمالی ختم رسولون کمالیدور
نازلی جمالی شیر خدانون جمالیدور
آهو باخشدی چونکه حسینون غزالیدور
اوز جدّی مرتضی تک اولارقهرمان عشق
زهرا عزیزی اوز بالاسین ائتدی پرورش
حُسن و ادبده اکبر ائدوب نئچّه ایل جهش
عشق حسین وئرردی اونون قلبیه تپش
اون سگیز ایل قوتولدی یتیشدی زمان عشق
حکم خداده گوردی حسین اختلال اولور
الدن گئدور کلام خدا ابتذال اولور
صوم و صلاه و حجّ و زکات انحلال اولور
شرعاً قیام ائدوب او زمان دیدبان عشق
انصاری یغدی باشینه مال و منالیلن
قارداشینی گوتوردی گئده تا جلالیلن
زینبده گلدی اکبر و قاسم جوانیلن
تکمیل اولوبدی دوشدی یولا کاروان عشق
کرب و بلا چولونده گلوب ایلدی نزول
ساکن اولا اویرده ائدوب جبریلن قبول
اون گون او چولده قالدی عزیز دل بتول
یوم بلا یتیشدی وئروب امتحان عشق
انصاری جمع ائدوب دانیشوب آل حیدره
غم حالتی یتیشدی عیال پیمبره
زینب گوروب حسین باخوری اوغلی اکبره
دوشدی بیر آیری ولولیه خانمان عشق
اذن ایستیوردی هر بیری شهدن دوشه یولا
گوردی حسین که آز قالوری وقت ظهر اولا
«حیدرباخشیلی گوزلری بیرباخدی ساغ صولا»
ائتدی اشاره اکبره ، وئرسون اذان عشق
وئردی اذانی اکبری ، باشلاندی تا نیاز
بیر نوعیلن آلوبلار او صحراده دستماز
تکبیراوخوندی تا قیلونا آخرین نماز
اولدی نمازی حشره کیمی جاودان عشق
یولداشلارین حسینون ائدوب قوم دون شهید
یالقوزلادی او شاهی او گون لشکر پلید
مظلوم امامی گوردولر اولادی چون وحید
سربازی یوخدی خالی اولوب پادگان عشق
اکبر قیام ائدوبدی دیوب ای شه امم
لطفا اجازه وئر منه منده کفن گیم
یا ئولدوروب بو لشکری یا من بو گون ئولم
هجریمده ایلیم آنامی نوحه خوان عشق
اذن آلدی شاهیدن گئده میدانه اول جوان
امر اولدی گئت خیامه سنی گوزلوری آنان
بیر آز زمان گئچوب علی عمرون اولار خزان
آغلار قالار دالینجا بالا بانوان عشق
لیلانی گئتدی خیمده گوردی اولوب غمین
عرض ائتدی قول وئر منه چوخ اولما دلغمین
من گئتمسم قتاله امامیم اولار حزین
ناقص قالار ازل یازیلان آرمان عشق
آلدی اجازه مرکبه میندی وقاریلن
ترک ایلدی خیامی او دم اختیاریلن
میدانه گلدی باخدی بیر آز انتظاریلن
پندیله آچدی لشکر کفره لسان عشق
ای لشکر پلید ایلیون شرم و عار و ننگ
آخر کیمین مقابیلینده ائدرسوز جهادو جنگ
گر آتماساز امامه طرف نیزه و خدنگ
نار جهیمیدن سیزه آللام امان عشق
من مرتضانین اوغلی حسین اوغلی اکبرم
گورمور گوزوز بوچولده شبیه پیمبرم
اما فنون جنگی آتام جانی ازبرم
قویمام بو چولده غرق اولونا ناوگان عشق
بیر دفعه آچمادوز گوزوزی سیز حقیقته
نمرود تک ندور اوخ آتورسوز شریعته
لااقل قولاق وئرون آخی بیر یول نصیحته
غیرتده یوخدی هیچ اولاسوز نادمان عشق
گوستردی بیر شجاعت او دم ابن مرتضا
شمشیریلن کیم اولدی مقابل ائدوب دوتا
آخرنه گلدی باشینه « شیدا » ایله حیا
یازما بهار اکبری ائتمه خزان عشق
