جڤاکا کو ژ ئەدەبیاتا نڤیسکی بێ‌پارە، ل بەرجی جڤاکەکێ کو ئاموورێ وێ یێ ھەری گرینگ، یانی پەیڤ، د دەق و نڤیسێن ئەدەبی دا ھاتیە پەروەردەکرن و وەرریە، گۆتنێن خوە بێ سەرووبەر، ڤک و ڤالا و نەدیار دەردبرینە. جڤاکەک کو ناخوینە و ھایا وێ ژ ئەدەبیاتێ تونە، ناتا جڤاکەکە کەر و لالان، لالەمە ب زمانێ وێ دکەڤە. ئەندامێن جڤاکەکە ھاکا و ب زمانەکی وسا بێ‌پەرگال و خاڤ، د پێوەندیێن خوە دا، دێ راستی دژوارینە مەزن بێن. نە تەنێ جڤاک ب گشتی، بەلکی یەک ب یەکێ ئەندامێن وێ ژی تووشی ڤێ کێشەیێ دبن. مرۆڤێ کو ناخوینە، ئان کێم دخوینە ئان ژی تەنێ بەربەلاڤ و ژ-ڤر-ژ-وی دخوینە، بێ گومان د ئاخافتن و رادەربرینا خوە دا تووشی ناکۆکیێ دبە؛ مرۆڤەکی ھاکا زێدە گەپ دکە، لێ ھندک دبێژە! ژ بەر کو پەیڤ و تێگەھێن وی تێرێ ناکن کو گۆتنا دلێ خوە ببێژە.
ژ ئالیێ دن ڤا، ئەڤ کێشە تەنێ ئالیێ گۆتن و رادەربرینێ ناگرە بەر خوە؛ ژ گۆتنێ وێداتر، بەھسا رامین و خەیلینێ یە کو لاواز و سینۆردار دبە. ژ بەر کو رامان و تێگەھ - کو ئەم ب ریا وان رەوشا خوە ھەست دکن و ب ھەبوونا خوە و دەردۆرا خوە دھەسن - تشتەک دەرڤەیی پەیڤان نینە. ئەم گەپکرنا دوروست، تێر و تژی، پژیایی و ب ژیری ژ ئەدەبیاتێ و تەنێ ژ ئەدەبیاتا باش دھێڤۆسن...!
پرتووک: چما ئەدەبیات - ماریۆ بارگاس یۆسا
وەرگەرا فارسی: ئەبدوڵاھ کۆسەری
وەرگەراندن بۆ کورمانجیێ: #بەرات_قەوی_ئەندام
تێبینی:
ل بەرجی: پێکا، د قیاس دگەل... .
دەق: نڤیس، دەست‌نڤیس
ئەدەبیات: وێژە
وەررین: کەملین، پێشکەتن
ناتا: مینا، وەک
لالەمە: لالووتە
دژوارینە: ھن دژواری
ژ-ڤر-ژ-وی: بەربەلاڤ، ھەر تشتەک ژ دەرەکێ
گەپکرن: ئاخافتن، پەیڤین
تێرێ-کرن: بەس بوون
رامین: فکرین
خەیلین: سێورین، ھێزا خەیالێ
* به‌شه‌ک ژ ڤێ نڤیسێ ب ڕێنڤیسا ئارامی ل پاش جلدا پرتووکا «ب زمانه‌کی دن» کو د پاییزا ۲۰۲۰ی دا هات چاپکرن، هاتیه وه‌شاندن.
