قتلگاهده قارداشون حسین
اولسا شمرله رو به رو باجی
تار زلفوی تکمه عارضه
یولما ساچلارون مو به مو باجی
هر باشون که عشق ابتلاسی وار
باشه یتمین بیر بلاسی وار
هرکسون منه اقتداسی وار
قانیلن ادر شستشو باجی
من که گلمیشم نشر حکمته
وار تحملیم هر مصیبته
چوخ لزومی وار اهل دعوته
طبع بردبار حسن خو باجی
وار سنون بیوک بیر متانتون
صبر و طاقتون، استقامتون
حالیمی گروب پوزما حالتون
شیوه ی رضا بودی بو باجی
عاشقون گرک فکری باز اولا
شرح هجردن بی نیاز اولا
عیش خوش او دور بزم راز اولا
بی تکلم و گفتگو باجی
عشق سرکشون چوخ مرامی وار
آیری نشئه سی آیری جامی وار
هاردا کیم تجرد مقامی وار
بی بهادی جام و سبو باجی
قتلگه دیمه، گلسِتاندی بو
طور جلوه ی دل سِتاندی بو
صدر مکتب امتحاندی بو
طرح حل اولور حی هو باجی
من بو گلشنه ایلرم روان
نهر نحردن چشمه چشمه قان
هاردا گورموسن بیله باغبان
بیله آبیار، بیله جو باجی
هاردا من دوشوب جان ایدم فدا
جوی خوندن اولمارام جدا
مقصدیم بو دور ایتمیم ادا
صون نمازیمی بی وضو باجی
من بیوک فرامینه حاملم
رشد فکرده فرد کاملم
شکر وار که بو لطفه شاملم
ویرموری منه کیمسه سو باجی
اود دوشه اگر خیمگاهیمه
همعنان اولا سوز آهیمه
یوخ دخالتی طی راهیمه
نعره الا حرّقوا باجی
اوندا که چخار خلددن آنام
آغلیوب دیر وای عزیز بالام
اوندا بل که ختم اولدی قتل عام
اولدی شوکتون زیر و رو باجی
اوندا صبر قیل طعن دشمنه
گلمسون گران هر جفا سنه
باشیم اوسته گل، گور نجه منه
ایسّی قوم اولوب پرّ قو باجی
گور نه یاتمیشام خواب نازلن
دل خوشام فقط بیر نمازلن
ایلرم بیوک بیر نیازلن
خیر امتی آرزو باجی
باش یارا بوتون عضو تن یارا
جمله طول و عرض بدن یارا
اوخ یاروب گچوب حددن یارا
قان آخار چوله سو به سو باجی
گورسن اکبریم غرق یاره دور
تار و پود تن پاره پاره دور
منحصر به فرد بیر بو چاره دور
تار زلفله قیل رفو باجی
پاره پیرهن بار جان اولور
بارماقیمدا گوزدن نهان اولور
سهم غارت ساربان اولور
چوخدی بوردا سرّ مگو باجی
پاکی هدف عشق بی نظر
شام و کوفه دن ایلمز حذر
یارین آختاران چوللری گزر
سو به سو باجی، کو به کو باجی
نیزه نی باشیم نخل طور ایدر
صحن مطبخی غرق نور ایدر
هاردا من اولام حق ظهور ایدر
گوسترر اوزین رنگ و رو باجی
رهبرم هامی اهل خیره من
فرق قویمارام یار و غیره من
باش چکم گرک پیر دیره من
بی ثمر دگل جستجو باجی
حشرده منم قاسم نعیم
منده دور او گون امر مستقیم
پیر درگهیم "هندی" قدیم
قویمارام اولا زرد رو باجی
