انتظار شیعه چکیر گلشنه باغبان گله جک
گلشنی سیراب ادن شبنم باران گله جگ
ابر رحمت یاغاچاق گلشنی سیراب ایلسون
نور وره گلرینه خورشید تابان گله جک
خس و خاشاک فسادی ادہ جک پاک و تمیز
تا اولا روی زمین مثل گلستان گله جک
ظلمت ظلمیله تاریک اولان روی زمین
تا که روشن ایلسون ماه درخشان گله جک
کاخ ظالملری بر باد ایلیه دنیا دا او
نفس حق دولانوب بادیله طوفان گله جک
ظلم و بی داد آغاجون ریشه کن ادماقدان اوتور
عدل بارانی یاغوب سیل خروشان گله جک
عدلی گسترده ادر سطح جهانا مثل علی
ذوالفقار الده انون چون شه مردان گله جک
دین اسلام اوگونی دنیا دا اجرا اولاجاق
دینی اجرا ایلین مجری قرآن گله جک
زورگویان جهان دنیا دا نابود اولاجاق
جانشین زور یرینه منطق و برهان گله جک
مضمحل ایله ماقا دنیادا فرعونلری
غرق اده بحر دینه موسی عمران گله جک
یرتیجی قوردون الینن بو دینی ساخلاماقا
بیر رشادتلی قوی دینه نگهبان گله جک
سلطه گر سلطه لری دنیا دا پایان چاتا
چون که عصرین امامی عالمه سلطان گله جک
صاحباں دینی چوخ ظلم و ستم بیمار ادیب
نگران اولماگلن دردیوه درمان گله جک
انسانون ایمانونی حب جهان الدن الوب
بهراصلاح جهان مظهر ایمان گله جک
ای جهان اهلی سنه مژده وروم واردی امید
سرو سامان تاپا دنیا شه خوبان گله جک
ای بشر یاتما اویان سن اوزون آماده ایله
دینی اجرا ایلین حجت یزدان گله جک
تر تمیز ایله گلن منزلیوی اهل جهان
بیر گوزل شخص جلیل منزله مهمان گله جک
ظالمان جهانی دنیادا قلع و قمع ادر
حامی مظلوم اولان قاتل عدوان گله جک
جمع اولار فسق و فجور دنیا دان آخر اوگونی
عالمه صاحب اولان صاحب دوران گله جک
سولدوروب گلشن دین گل لرینی باد ستم
نیمه جان مکتب دینه او زمان جان گله جک
نظم دنیانی وروب بیر بیرینه جور و جفا
دنیانی نظمه سالان بو شریف انسان گله جک
بو شریف انسان اوچون عاشق دیدار منم
چهره سین گورسم اگر قلبمه شادان گله جک
عصر بیداری اولوب دنیادا آماده اولور
نایب ختم رسول عاشق سبحان گله جک
اعلمی اولما ملول دنیا بله قالموياجاق
گر صلاح گورسه خدا محبوب جانان گله جک
