ای باد صبا دردیمی گئت یاره یتیر سن
عاشق سلامون معشوق دلداره یتیر سن
معشوقیمه ده عشقون ائدیب عاشقی بیمار
عشقون دواسون عاشق بیماره یتیر سن
عشقون دواسی مه جمالوندا قره خالدی
بو گؤزلریمی او رخ خالدار یتیر سن
محبوس غمم عاشق دیداریوم ای یار
ناز ائلمه یار عاشقی دیداره یتیر سن
عشقون گمیسی بحر غمه غوطه ور اولموش
ای منجی من غرق اولانا چاره یتیر سن
گؤیلوم قوشی پروازه گلوب تا گله قونسون
مقصوده چاتا گلشن و گلزار یتیر سن
یاندیردی منیم قلبیمی چوخ آتش عشقون
بور مطلبی گئت یار وفاداره یتیر سن
من نیلموشم یاریم ائدیب قهر الهی
لطف ائله خدا یاری بو غمخواره یتیر سن
یولاره باخار دیده گریان توکر اشکین
یا رب خبر خوش دل خونباره یتیر سن
پروانه کیمین عاشق اولوب گؤل رخه گؤیلوم
بو لبلریمی او رخ گلناره یتیر سن
من بوسه وؤروم لبلریوه مست ائده عطرون
گؤیلوم خوش اولا دلبره عطاره یتیر سن
بیچاره لرین دردینه درمان ائدن الله
توفیق منین جمله گنهکاره یتیر سن
باشدان ایاقا غرق گناه راه نجات یوخ
عفویله کرم بنده دل زاره یتیر سن
لطف ائله خدا زائر اولوم قبر حسینه
بو اللریمی قبر او سرداره یتیر سن
اشکیم آخوری نام ابوالفضلی یازاندا
بو اشکلری صحن علمداره یتیر سن
امر ائلدی عباسه حسین قارداش ابوالفضل
سو تشنه بالام اصغر شیرخواره یتیر سن
گؤل تک سارالوب سوز عطشدن بالام اصغر
بو مطلبی گئت قوم ستمکاره یتیر سن
قسمت ائله یارب بیزه سن قبر حسینی
بو توفیقی سن اعلمی زاره یتیر سن
