یا رب گؤرسن بس نئدی غوغا بو شهر ده
برپادی قیامت گؤنی گویا بو شهر ده
گؤردوم که دولوب شهر بوتون عکسله یکسر
گئل ائله گلن سنده تماشا بو شهر ده
مردم هاموسی بیر بیرینه چالخالانوبدی
چون موجه گلوب بیر یکه دریا بو شهر ده
پرسش ائلدیم وار نه خبر بوردا آی اوغلان
سویلوبدی سچیلر بیزه شورا بو شهر ده
یوزدن یوخاری نامزد اولدی بو شهر ده
پیریله جوان زشتیله زیبا بو شهر ده
دوت بانو قارشدی بولارا کاندیدا اولدی
پرواز ائلیوب غازیله دورنا بو شهر ده
دعوت ائلیوب نطق ائده لر مردمه اولار
صحبتده اولوب بلبل شیدا بو شهر ده
بیر عده منیم تک که اونون یوخدی بیانی
اهدافونی او اتمدی افشا بو شهر ده
گؤردوم که هامی عکس وروب بیرجه منیم یوخ
افسوس ائدیرم من داخی بیجا بو شهر ده
هامی یازولوب بیرجه قالوب السیز ایاقسوز
سرّی نئدی کاندید دگی ملا بو شهر ده
بیزلرده یاتوب یوخولاموشوق بس نیه یارب
چوخلار گؤز آچوب اولدولا بینا بو شهر ده
صحبت ائدیری وعده وریر ملته چوخلار
اعجاز ائلرم چون ید بیضا بو شهر ده
خفاش گئجه پرواز ائلیر گوندوز اوچانماز
گوندوزده اوچوب اولدولا عنقا بو شهر ده ه
هر نامزدین سؤزلرینه ایلمه باور
بو ملته ایستير وورا توربا بو شهر ده
بو شهر ده بیر طرح توکوب مسئول آگاه
چوخ طرح پسندیده دی جانا بو شهر ده
چون عکسلری وردولا مخصوص مکانه
من شکر ائلیرم اولمادی دعوا بو شهر ده
چوخلار یازیلوب تا اولا او شهر ده شورا
پول خشله دیلر اولدولا تنها بو شهر ده
چوخلار اؤزونی شورا بولوب شرکت ائدیبدی
بو فکری ائدیب اولدولا پیدا بو شهر ده
چوخلاردا کباب عطرین آلوب شرکت ائدیبلر
پیشمز داداشم بو اوتا شوربا بو شهر ده
قویماز یتیشاق بیز هدفه خشکه تعصب
چون ملتی قویدی دالی چوخدا بو شهر ده
ای کاش او سئچیلسین که اولا مرد شجاعت
گؤیچک بو ایشی اولدولا اخفا بو شهر ده
ای کاش سئچیله انجمنه صاحب قدرت
نا حقه اولار ورمیه امضاء بو شهر ده
یارب گؤرسن کیم اولاجاق شهرده شورا
خدمت ائلین یا ائدن ایذا بو شهر ده
ورمزدی سلام سایمازدی بیزلری هیچ وقت
ایلیبدی سلام حالیمی جویا بو شهر ده
بیر عده اؤزون تعریف ائدیب بلکه سئچیلسین
سویلوبدی منم لایق تنها بو شهر ده
من وعده ویریم تا منی تعیین ائلیون سیز
من وعده مه چوخ ائلیرم ایفا بو شهر ده
چوخ خرج ائلیوب چاتمادی مقصودینه نینیم
ای کاش ائده لر پولاری اهدا بو شهر ده
بعضی چایلا میوه ائلن اولدی پذیرا
بیر عده ادیب شامیله سودا بو شهر ده
بعضی کوچه ده بعضی بازار بعضی ده یولدا
تبلیغ ائلیوب با دل شیدا بو شهر ده
سن ائله نظر بیزلره ای خالق سبحان
شورالر اولا صاحب تقوا بو شهر ده
کاش افراد دانائیله لایق اولا شورا
اولاردی ائدن قانونی اجرا بو شهر ده
لطف ایله بیزه بولار اولا مردم صادق
هم ده اولالار عالم و دانا بو شهر ده
بیر عده اؤزون سوخدو گؤزه بلکه سئچیلسین
رد اولدی داها اولمادی شورا بو شهر ده
چوخلار گؤزی وار تودوغونی لیک بوراخمور
يارب نئدی بس بوقدر اعمی بو شهر ده
افسوس حقیقت آجدی اولمادی مقبول
یارب اؤزن ائد حل معما بو شهر ده
ای کاش اولالار ملته دلسوز و فداکار
وار مطلبی درک ائلین آیا بو شهر ده
تقواسی اولان ملته دلسوز اولاجاقدور
ای اعلمی قورتار سؤزی بوردا بو شهر ده
باخ سن اولارون حالینه چوخ روز شنبه
چوخلار باتاجاق ماتمه فردا بو شهر ده
