اشعار حاج حسین اعلمی (۷۰) شاعر دگولم

سعدی دگولم شعریم اولا فاقد ایراد

حافظ دگولم شعرده من تا اولام استاد

تقدیر ائدیرم استاد ائدیر بیزلری ارشاد

                                                  شاعر دگولم شعریم آتاقاش هامی گولسون

                                                مقصودوم اودی مطلبی یولداش هامی بولسون

صائب دگولم شعرلرین وزنی دوز اولسون

واحد کیمی شعریمده منیم آهو گؤز اولسون

سعیم بودی که سؤزلریمده بیرجه سؤز اولسون

                                                 حق نوری او سؤزله یاییلا عالمه یکسر

                                                    تا روشن اولا حق سؤزیله قلب مکدر

میدان شعریم چونکه منیم آلچاق اوجادی

علت او دوکی شعریلریم شعر نمادی

بو شعری یازان سنی کچن بس که قوجادی

                                                 انسان که قوجالدی داخی مغزینده هوش اولماز

                                              گلشنده عزیز هامی گؤلون رنگی خوش اولمار

عشقیمدی چکیر بس که منی محفل شعره

موجب اولوری تا که باتام من گل شعره

یوخدور توانیم فائق اولام مشکل شعره

                                                       عفو ائیله منی ای گوزلیم دانشیم آزدی

                                                       شعر یازماقا چوخ بو دل زارم ولی بازدی

دوز خطوی گئت تا که گئدیب یولد سن آزما

شعر وزنینی سن بولممیسن شعر داحی یازما

بو نحویله سن یولداشون بینینی قازما

                                                                   شعر دفترینی آتگلا بیر گوشده قالسون

                                                               شعر عشقی سنی قوی گلا تا چولره سالسون

شعر دفترینی آتگلا دریایه دریایه نم اولسون

سن شعر دیمه شعر فضاسی تا که چم اولسون

استاد سخن قلبینه تا اینکه غم اولسون

                                                           اوتورماگلان شعر ائوینه شعر ائوی یانسون

                                                        بیر شعر دگلن شعر ائشیدن شعریوی قانسون

سئرچه بویانوب عالم آرا بلبل اولانماز

یار زلفی گئدیب دنیادا او سنبل اولانماز

بو اعلمی هیچ وقت گئدیب خوشدل اولانماز

                                                               بو شعریلریم چشمه مغزیمنن آخاندی

                                                               شعر خرمنینه گوشه چشمیله باخاندی

حق سؤزلریوی نظمه چکوب شعرله سویله

شعر اوخلارینی حق دئمین دیلره دوزله

علمون سنین آزدی گوزلیم بیر بالا گؤزله

                                                     حق سویله گنن دوز عمل ائد دو ایشین اولسون

                                                            تا اینکه سؤزون قلبلره دلنشین اولسون

شعر سویله ماقون لذتنی آنلاموشام من

بی وقت خروس تک گئجه لر باناموشام من

هر بیر گئجه بو نفسیمی چوخ دانلاموشام من

                                                              بوشلا بو ایشی آخری دیوانه اولارسان

                                                              می ایچمه گلن عاشق میخانه اولارسان

دنیا گئدیری تا که جوان پیر اولاجاقدور

ناحق اولان حق سؤزه دلگیر اولاجاقدور

حق سؤزلر اوغول قتلیوه شمشیر اولاجاقدور

                                                          حق شمشیری قوی باشوا دیسین یارالانسون

                                                             بو نحویله تا حقیله باطل آرالانسون

شاعر دگوسن سویله سن یار و گؤزلدن

گئت شعر دیماقی باشلاگلن سنده ازلدن

تا باش تاپاسان سنده بالا شعر و غزلدن

                                                         شعر سویله ماقا لازمه دور ذوق و طبع اولسون

                                                           علمیله هنر، حوصله تا اینکه جمع اولسون

با وزن دگول شعرلریم باسکولا گئدسین

یوخ سرعتی تا اینکه ساغا یا سولا گئدسون

یونگولدی شعرلریم سرعتی یوخ دوز یولا گئدسون

                                                       سنگین اولا یوک سرعت اولا یولدا پیچ اولسا

                                                             شعر ماشینی یولدا قالی راننده گیچ اولسا

بو مطلبی من عرض ائدیرم لب کلامدی

بیر گنبدی گؤردوم که ده دیم قبر امامدی

گیردیم ائچینه زوار اولام گؤردوم حمامدی

                                                                 حماما اوغول قبر امام ظاهر اولانماز

                                                                 بش بیت غلط شعر دئین شاعر اولانماز

شاعر سووری شعرلرینین صیقلی اولوسون

شعر یازماق اوچون میزلی بیر صندلی اولسون 

اوزان شعری یاخشی اولا منقلی اولسون

                                                             تریاکی چکوب دودینی تا هضمه یتیرسون

                                                            تا اینکه تاپوب حال، سؤزونی نظمه یتیرسون

من اهل بافور اولماموشام اولمارام هیچ وقت

او اهل بافور اولدی بیزه بیر یئکه عبرت

تا زهرمارا عادی اولوب تابمیا ذلت

                                                               من ایستمیرم وزن شعریم دوز اله گلسون

                                                           تریاکی چکوب نئشه اولوب حوصله گلسون

بو شهریموزون شاعر اولان بلیلی چوخدی

شعر سویله ماقون نازلی بالا مشکلی چوخدی

دردلردی اونی شاعر ائدیب نسکلی چوخدی

                                                       قوی دردلرینی شعره چکوب قلبی بوشالسون

                                                              قلبینده اولان غصه و غم بلکه آزالسون

احساس ائدیرم نوریه ظلمت بارشوبدی

گویا بو زمان حقیله باطل قاروشوبدی

بو علته چوخ بو دل زارم آلوشوبدی

                                                    حق سؤز دینیین دل چیخاجاق بولکه کوکونن

                                                        داردان آساچاقلار اونی تا اینکه توکونن

حقّون سؤزونه هیچ وعده ناحق دوزنمز

ناحق گئدیب وادی رحمته گزنمز

ناحق نه قدر اولسا قوی حقی ازنمز

                                                               ظاهرده اگر حق اؤله آخر دیریلر او

                                                              باطلدی گيدر دنیادان آخر سیلینر او

عشاق شعرون لازمه دور نفسی خوار اولسون

حق سؤز دینین دنیابوئی آغزی وار اولسون

ناحقی گؤروم شغلی اونون آه و زار اولسون

                                                            دنیانی وورار بیر بیرینه ناحق یازانلار

                                                           دریای خون ائیلر جهانی حقی پوزانلار

بیر عده گینه من گؤرورم حقی ازیلر

صندوق تولاسون فرد وروب گربه بزیلر

تا مرکب ناحقی مینوب گؤیده گزیلر

                                                        بیر گون اولاجاق مرکب ناحق یخاجاقدور

                                                        ناحقون اوغول جانی دالونان چیخاجاقدور

ایندی مد اولوب فتنه نی هر یرده اکیلر

ناحق اوغول حق لباسون مدلی تیکیلر

بو نحویله چوخ قلبیلری درده چکیلر

                                                                   بو ملت اوچون لازمه دور تیغ عدالت

                                                                 انسان بئله اسلامه چکیر چوخلی خجالت

بعضی شعریمون مصرعی دوت صندله بنزر

بیر عده شعریم چوخ یوموشاق مخمله بنزر

دیوان شعریم قوخمالیدی جنگله بنزر

                                                         شعر جنگلینه گیرمه بالا اوردا پله وار

                                                         چوخ ورمه فیکر شعریمه چون اوندا کله وار

بیر بیت غلط شعر دئدم دل کباب اولدی

بوشلا بو ایشی شغلوا گئت هوش خراب اولدی

بونان دالی بیت آه دله بول جواب اولدی

                                                        چوخلاری مقامه یتیرن ایندی یالاندی

                                                         بو خشکه تعارف بو زمان یاخشی پالاندی

صحرای شعره من باخورام چوخ یئری نوردی

دریای شعرین ایچمه سویون چون سویی شوردی

بو اعلمنون شعرلرینین بیر باشی زوردی

                                                          زور گلدی بالاقد باجادان گئتمه لی اولدی

                                                        چک شعرلریون اوستونی سن یاتمالی اولدی