مولود رجب کعبه یزدان علی دور علی
محبوب خدا عاشق سبحان علی دور علی
گون گلدی چاتوب اون اوچ ماه رجب اولدی
تا زادگه شیر خدا منتخب اولدی
میلاد علی دنیا دا چوخ چوخ عجب اولدی
مبهوت قویان عالمی حیران علی دور علی
تاریخ نویس بیله یازوب بیله دور اخبار
منشق اولوب مکّه ده اوگون کعبه ی دیوار
تا داخل اولوب بنت اسد مادر اسرار
اسرار خدا حجت و برهان علی دور علی
اعجاز ادیب مکّه ده اوگون خالق دادار
بو مطلبی او مادر تنها ادیب اظهار
بطنینده اولان گوهر ادیب خالقه اقرار
دنیا یه گلن حامی قرآن علی دور علی
دریای عفافه آناسی تنها صدف دور
گویا او صدف ایچره اولان درّ شرف دور
دنیایه گلن کعبه ده اوگون شاه نجف دور
او درّ شرف عالمه سلطان علی دور علی
گوز آچدی علی کعبه نی اولده گوروبدی
اوز خالقینین نورنی او دلده گوروبدی
باخدی آناسی قدرتینی الده گوروبدی
او پنجه سی چون پنجه شیران علی دور علی
کعبیه قویدی قدم مکه ده چوخ غلغله دی
گلدی دنیایه علی نوری تلالوء ایلدی
نور حق ظاهر اولوب کعبه ده حقا بلدی
او نور خدا شمع فروزان علی دور علی
گلدی قویدی قدمون سطح جهان اوسته، علی
نور باران ایلدی کعبه نی وارسته علی
عالمی خوشبو ادیب نو گل شایسته علی
خوشبوی جهان نوگل رضوان علی دور علی
چون نوری علی رب جلیل حقدن آلوبدی
حق نوری آلوب چوخ اوجالوب عرشه چاتوبدی
او نوری دونوب سطح جهان اوسته سالوبدی
حق نوری آلان ماه درخشان علی دور علی
اللهدان اوگون عالمه رحمت یتشبیدی
اسلامه کمک، حامی و قدرت یتیشبدی
مشرک لره چوخ مکه ده ذلت یتیشبدی
قرآنه کمک او شه مردان علی دور علی
عالم هستی اوگون چوخلی صفا تابپوشدی
نور تقوی اوجالوب عرشه گدوب چاتموشدی
بت پرستان جهان چوخدا غمه باتموشدی
چون شیر خدا ضیغم میدان علی دور علی
اسلامه اوگون اولدی علی حامی و دلسوز
روشن ایلوب تیره شبی شمع دل افروز
خورشید نبوت داها تک قالمیا آی سوز
خورشید دینه او مه تابان علی دور علی
پیغمبر چون لطف ایلدی خالق یکتا
پیغمبری چوخ شاد ایلدی مولود زیبا
تکمیل اولا دین، ختم رسول قالمویا تنها
تکمیل دینه با دل سوزان علی دور علی
دریای سخا کان وفا شیر خدا دور
ظالملره دشمندی ولی دینه فدا دور
مظلومه کمک شیعه لر بس که رجا دور
بیچاره لرین دردینه درمان علی دور علی
علم دریاسینه، عالملره سروردی علی
شیعه جنت آرا ساقی کوثردی علی
علم اگر اوسا مدینه اونا بس دردی علی
عارف لر اوچون معلم عرفان علی دور علی
بیر لنگردی اسلام اچون وجود حیدر
عالملری حیران ایلوب سجود حیدر
دنیا بویی دلرده قالار او جود حیدر
قیرخ اوده اولان بیر گجه مهمان علی دور علی
توصیف اده بولمزله اونی اهل هنر لر
قاصردی بیان تعریف اده تا بو بشرلر
وصفین دییه بولمزله اونا صاحب اثرلر
تحسین شده خالق جانان علی دور علی
دریای دینین سن سن آقا تنها نهنگی
میدان جهادون سن اولان شیر و پلنگی
عزت یارادان دفن ایلین ذلت و ننگی
اوّلده اولان بیرجه مسلمان علی دور علی
خندق گونی خندقدن آشوب گلدی او عنتر
ایستدی مبارز اونا چوخ ختم پیمبر
آماده جنگ اولدی اوگون سنی آز حیدر
او حامی دین صاحب ایمان على دور علی
میدانه قدم قویدی علی با دل سنگین
سویلوبدی ثنا آللها چوخ باشلادی جنگین
بیر ضربه وروب دشمن اولوب قانیله رنگین
با قدرت اولان شمشیر برّان علی دور علی
اسلامی دیریدی اوگونی بیرجه او شمشیر
پیغمبری شاد ایلدی چوخ دشمنی دلگیر
نابود ایلدی کفری علی سویلدی تکبیر
از بهر خدا قاتل عدوان علی دور علی
دنیاده علی بت لاری چوخ سرنگون ادی
خیبر قاپوسون تک الینن واژگون ادی
شمشیر علی خیبری دریای خون ادی
خیبر فتح اولوب اول شه مردان علی دور علی
چون کوه احده اولونوب جنگ له پیکار
اطرافون آلوبدی نبینی اولدوره کفار
حفظ ایتدی علی زنده قالوب احمد مختار
حافظ نبیه دینه نگهبان علی دور علی
چوخ سعی ایلیوب ختم نبی تا قالا سالم
شمشیر الینده دولانوب باشینه دائم
چوخ یاره وروبدی علیه لشکر ظالم
دین اوسته اولان پیکری شان شان علی دور علی
تصمیم بله توتدی او زمان مکّه کفار
پیغمبری بسترده گجه الدوره اشرار
یادّی ییرنه حفظ اولا دین، حیدر کرار
بسترده یاتان قوخمویان انسان علی دور علی
معراج ایلیوب گویلر چوں نبی داور
تا گلدی چاتوب قابیله قوسین او سرور
دیداره گلوب گویده اوگون فاتح خیبر
سیّار جهان زهره و کیوان علی دور علی
گون اگر اولسا کرم، خورشید انوردی علی
عدل اگر اولسا خزینه اونا گوهردی علی
ره عشقینده اولان لاله احمر دی علی
اوز مکتبینه دینینه قربان علی دور علی
دریالر اگر سو یرونه اولسا مرکب
چوب میشه لر اولسا قلم یازسا مرتب
جنیله بشر فضل علیده یازا مطلب
او کیمسه که یوخ فضلنه پایان علی دور علی
هر قدر یازالار فضل علىنی تمام اولماز
عالمده علی مکتبی تک بیر مرام اولماز
عقباده علی رتبه سی تک هیچ مقام اولماز
الا که نبی، حشرده میزان علی دور علی
گون اولدی اوگون مکّه نی فتح ادی پیمبر
قویدی ایاقون چینینه پیغمبرون حیدر
کعبه دامونا چیخدی توکوب بتلری یکسر
نابود ایلین بتلری هر آن علی دور علی
بی حبّ علی کل عمل هیج و فنا دور
میزان عمل حبّ علی روز جزا دور
چون حکم علی روز بقا حکم خدا دور
تقسیم جنان، آتش نیران علی دور علی
عاشقلرینه وعده جنت ورن آلله
لطف ایله مقام علیه بیز اولاخ آگاه
تا حب علی روشن اولا قلبده آنگاه
چون دادرس و صاحب احسان علی دور علی
ای شیر خدا الله اوچون سنده ولی سن
پیغمبر نائب سن، علی حق جلی سن
عاشقدی سنه اعلمی چوخ، سنده علی سن
عشاقون ادن مشکلون آسان علی دور علی
